Nyuma y'igihe kitari gito abakunzi b'umupira w'amaguru mu Rwanda n'abatoza b'ikipe y'igihugu Amavubi binubira ko iyi kipe itabona imikino ya gicuti ihagije, iki kibazo biragaragara ko cyatangiye gukemurwa.
Mu minsi itari myinshi ishize Amavubi yakinnye imikino ya gicuti n'ibihugu bitandukanye birimo Central Africa Republic, Equatorial Guinee n'ibindi.
Hari hashize iminsi hahwihwiswa amakuru y'uko ikipe y'igihugu Amavubi yaba iri gutegura imikino ya gicuti n'ikipe y'igihugu ya Sudan, ariko ubu amakuru ntabwo akiri ibihuha kuko yamaze kwemezwa n'ababishinzwe.
Mu kiganiro umunyamabanga wa FERWAFA Muhire Henry yagiranye na Radio Rwanda mu Rubuga rw'imikino, yemeje ko Amavubi azakina na Sudan imikino ibiri ya gicuti izabera mu Rwanda.
Umukino wa mbere uzakinwa tariki 17 Ugushyingo 2022, uwa kabiri ukinwe tariki 20 Ugushyingo 2022, ndetse yose izakinirwa kuri sitade ya Kigali i Nyamirambo mu gihe abenshi batekerezaga ko nayo yakinirwa i Huye nk'uko byagenze ku yindi mikino Amavubi yakinnye muri uyu mwaka.
Andi makuru kandi ataremezwa avuga ko ikipe y'igihugu Amavubi izakina umukino wa gicuti n'ikipe y'igihugu y'Uburundi.
Iyi mikino ikomeje gutegurwa mu gihe ibindi bihugu bigiye kujya mu mikino y'Igikombe cy'isi, ariko u Rwanda rukaba rurajwe ishinga n'imikino yo gushaka itike y'Igikombe cy'Afurika izaba mu 2023.
Muhire kandi yamaze impungenge abatekerezaga ko imikino ya shampiyona y'u Rwanda yazahagarikwa kubera imikino y'Igikombe cy'isi, avuga ko kuko nta bakinnyi bazava mu Rwanda ngo bajye muri Qatar ntakizabuza shampiyona gukinwa.
Ku bijyanye no gusubika shampiyona bitewe n'iyi mikino ibiri ya Sudan, Henry avuga ko bagiye kureka umutoza Carlos Alôs Ferrer agahamagara abakinnyi azifashisha hakabona gufatwa iikemezo.
Ikipe y'igihugu Amavubi irahamagarwa vuba aha (Net-photo)
