Mu gihe amatora ya perezida wa FC Barcelona ateganyijwe ku wa 15 Werurwe 2026 yegereje, izina rya Messi ryongeye kuvugwa cyane.
Mu Ugushyingo 2025, Messi w’imyaka 38 y'amavuko, yasuye Camp Nou mu buryo butunguranye, agaragaza ko yifuza kongera kugira uruhare muri Barcelona.
Nubwo umubano we na Joan Laporta utigeze uba mwiza kuva yava muri Barcelona, Messi akomeje gukurikira ibibera muri iyi kipe yakiniye imyaka myinshi.
Ikinyamakuru Sport kivuga ko atigeze ahura n’abakandida ku mwanya wa Perezida, kandi yirinze kwivanga mu matora kubera inshingano ze muri shampiyona y’umupira w’amaguru muri Leta Zunze Ubumwe za Amerika (MLS).
Nyuma yo gusoza amasezerano ye na Inter Miami, Messi bivugwa ko ateganya gusubira gutura i Barcelona, aho ashobora kuzagira uruhare mu miyoborere ya siporo muri iyi kipe, bitewe n’uzatorwa k’ubuyobozi bw’ iyi kipe.
Kuri ubu, akomeje kwibanda ku mikino ye muri Amerika, ariko akareba kuri ejo hazaza h’ikipe yubakiyeho izina rye rikomeye.
Messi ashobora gusubira muri FC Barcelona mu zindi nshingano
Umwanditsi: NIYOMUKIZA Gratien
