PSG yegukanye igikombe cy’i Burayi, ihabwa miliyoni 144 z’Amayero, iba ari nayo kipe yinjije menshi kurusha izindi. Inter Milan yabaye iya kabiri yinjije miliyoni 136 z’Amayero.
Ku makipe menshi yo ku mugabane w’i Burayi, Champions League si igikombe gusa, ahubwo ni isoko rikomeye ry’amafaranga afasha gutegura ingengo y’imari, kugura abakinnyi no kubaka ejo hazaza hayo harambye.
Mu mwaka ushize, UEFA yatangaje ko yatanze miliyoni 400 z’Amayero ku makipe atarageze mu cyiciro cy’amatsinda, ndetse andi miliyoni 308 z’Amayero ahabwa atararenze ijonjora ribanza.
Arsenal na Barcelona buri imwe yinjije miliyoni 116 z’Amayero, Bayern Munich ibona miliyoni 105 z’Amayero, Borussia Dortmund yinjiza miliyoni 102 z’Amayero.
Real Madrid nubwo yagarukiye muri ¼, yabonye miliyoni 101 z’Amayero, Liverpool yo yinjije miliyoni 98 z’Amayero, Bayer Leverkusen ibona miliyoni 87, naho Atlético Madrid isoza mu icumi za mbere n’amafaranga angana na miliyoni 84 z’Amayero.
Ikipe ya Girona imwe mu zatunguranye muri iri rushanwa, yahawe miliyoni 29 z’Amayero, amafaranga afatwa nk’inyongera ikomeye ku kipe nk’iyi.
Iyi mibare igaragaza ko gutsinda no kugera kure muri Champions League bidatanga icyubahiro gusa, ahubwo binatanga inyungu z’amafaranga zikomeye zigira uruhare runini mu iterambere ry’amakipe akomeye ku mugabane w’i Burayi.
Umwanditsi: NIYOMUKIZA Gratien
