Ni umukino wa mbere wa gicuti hagati y'ikipe y'igihugu Amavubi n'ikipe y'igihugu ya Sudan wabereye kuri sitade ya Kigali i Nyamirambo kuri uyu wa Kane.
Abakinnyi b'Amavubi babanje mu kibuga
Abakinnyi ba Sudan babanje mu kibuga
Igice cya mbere cy'uyu mukino cyaranzwe n'ikipe y'igihugu Amavubi yahererekabyaga neza ndetse igasatira izamu rya Sudan, ariko gushyira umupira mu nshundura bikanga.
Ku munota wa 8 u Rwanda rwashoboraga kubona igitego aho Mugenzi Bienvenu yagerageje gutsinda igitego n'umutwe, umupira ujya hanze y'izamu rya Sudan.
Ku munota wa 24' Hakizimana Muhadjiri yatereye kure ishoti rikomeye ariko Umunyezamu wa Sudan ahagarara neza, umupira arawurenza.
Ku munota wa 45' Mugenzi Bienvenu yongeye kubona uburyo bw'igitego, ateye umupira n'umutwe ujya hanze, mbere y'uko Umusifuzi Ruzindana Nsoro yemeza isozwa ry'igice cya mbere.
Mbere y'uko igice cya kabiri gitangira, Amavubi yakoze impinduka eshatu, mu kibuga hinjira Hakim Sahabo, Ishimwe Gilbert na Habimana Glen, hasohoka Hakizimana Muhadjiri, Nshuti Savio na Mugenzi Bienvenu.
Ku munota wa 70' Hakim Sahabo yateye ishoti rikomeye ku mupira uteretse (Kick off) unyura hanze y'izamu.
Ku munota wa 73' rutahizamu Yagoub Mohammed wa Sudan yategewe mu rubuga rw'amahina na Manzi Thierry, abanya-Sudan bosanga Umusifuzi Ruzindana Nsoro basaba ko abaha Penaliti ariko arabyirengagiza, ibyanatumye habaho amahane yamaze akanya gato.
Amavubi yagowe no kubona igitego kuri Sudan
Ku munota wa 77' Amavubi yongeye gukora impinduka, mu kibuga hinjira Gerard Gohou, Muhoozi Fred na Imanishimwe Emmanuel, hasohoka Muhire Kevin, Niyomugabo Claude na Nshuri Savio.
Ku munota wa 80' Amavubi yongeye gusimbuza abakinnyi batatu, hinjira Rafael York, Serumogo Ally na Niyigena Clement, hasohoka Bizimana Djihad, Manzi Thierry na Fitina Ombolenga.
Amavubi na Sudan bazakina umukino wa kabiri wa gicuti uteganijwe kuzabera kuri Stade ya Kigali i Nyamirambo ku mugoroba wo kuwa 19 Ugushyingo 2022.
