Ikipe ya Chelsea yamaze gusinyisha umwongereza Raheem Sterling nyuma yo kumutangaho miliyoni 50 z'amapawundi, ndetse asezeranya abafana kugera kuri byinshi mu mwambaro wa Chelsea.
Sterling w'imyaka 27 wakiniraga Manchester City, yasinye amasezerano y'imyaka itanu muri Chelsea, akaba azajya ahembwa arenga ibihumbi 300 by'amapawundi ku cyumweru.
Raheem Sterling yamaze kuba umukinnyi wa Chelsea(Net-photo)
Raheem Sterling yari amaze imyaka irindwi muri Manchester City yagezemo nyuma yo kugurwa miliyoni 50 z'amapawundi ava muri Liverpool. Manchester City yayikiniye imikino 300, atwaramo ibikombe 11 byose.
Mu gihe kandi iyi kipe y'i London yamaze gusinyisha uyu musore wataka aciye ku ruhande, mu masaha make byitezwe ko iza gusinyisha myugariro Kalidou Koulibaly usanzwe akinira Napoli yo mu Butaliyani.
Uyu myugariro agiye kwinjira muri Chelsea nyuma y'uko iyi kipe yatakaje ba myugariro babiri yagenderagaho mu mwaka w'imikino ushize aribo Christensen wagiye muri FC Barcelona na Antonio Rudiger wagiye muri Real Madrid.
Abakinnyi batangiye gusinya ku ngoma ya Todd Boehly(Image:Football london)
