Uyu mukinnyi w’imyaka 32 y'amavuko, yari asanzwe akurikiranyweho ibindi birego bitanu byo gufata ku ngufu biturutse ku bagore babiri, ndetse n’ikirego kimwe cy’ihohoterwa rishingiye ku gitsina ku wundi mugore wa gatatu.
Ibirego bishya byatumye dosiye ye igera ku bagore bane bamushinja ibyaha birindwi bitandukanye.
Abashinjacyaha batangaza ko ibyaha biri muri iyi dosiye byabaye hagati ya 2021 na 2022, mu gihe Partey yari akiri umukinnyi wa Arsenal.
Thomas Partey ategereje kwitaba urukiko rwa Westminster Magistrates rwo mu Bwongereza ku wa 13 Werurwe 2026, mu iburanisha rya mbere.
Mbere yaho, muri Nzeri 2025, yari yitabye Urukiko rwa Southwark Crown ahakana ibyaha byose aregwa, anahabwa uburenganzira bwo kuburana ari hanze.
Urubanza rwe nyamukuru ruteganyijwe gutangira ku wa 02 Ugushyingo 2026, rukazaburanishirizwa imbere y’umucamanza w’Urukiko Rukuru mu Bwongereza.
Nyuma yo kuva muri Premier League, Partey yasinye amasezerano y’umwaka umwe mu ikipe ya Villarreal yo muri Espagne. Ibi byemejwe mu mpeshyi, nyuma y’uko ibirego bya mbere byari bimaze gutangazwa.
Umunyamategeko we, Jenny Wiltshire yatangaje ko umukiriya we ahakana ibyaha byose aregwa, kandi ategereje ko urukiko ruzamufasha kugaragaza ukuri no guhanagura ibi byaha ku izina rye.
Ibi birego bishya byazamuye impaka mu Bwongereza no mu bakunzi b’umupira w’amaguru ku isi, aho benshi bategereje kureba icyemezo cy’urukiko ku byaha aregwa.
Umwanditsi: NIYOMUKIZA Gratien
