Neymar Jr yamaze kugera i Barcelona aho yagiye kwitaba urukiko nyuma y'uko kompanyi ya DIS y'iwabo muri Brazil imusabiye gufungwa imyaka itanu no gucibwa ihazabu ya miliyoni 130 z'amapawundi.
Iyi kompanyi yareze Neymar Jr imushinja ko ubwo yavaga muri Santos yo muri Brazil yerekeza muri FC Barcelona mu 2013, hajemo amanyanga ndetse na ruswa mu buryo yaguzwe.
Ubwo FC Barcelona yaguraga Neymar Jr mu 2013, DIS yari ifite uburenganzira bungana na 40% kuri uyu mukinnyi.
Iyi kompanyi ivuga ko itabonye amafaranga yagombaga kubona kuri Neymar kuko uyu mukinnyi yagurishijwe amafaranga ari munsi cyane y'agaciro yari afite.
Neymar yitabye urukiko i Barcelona(Image:AFP)
Muri icyo gihe FC Barcelona yatanze miliyoni 50 z'amapawundi kuri Neymar wavaga muri Santos, aho bivugwa ko miliyoni 35 z'amapawundi zose zahawe umuryango wa Neymar.
DIS yatanze miliyoni 1.7 y'amapawundi igura 40% by'agaciro ka Neymar ubwo yari afite imyaka 17, aha bivuze ko mu gihe uyu musore yari kuba agurishijwe iyi kompanyi yagombaga kubona 40% y'amafaranga yaguzwe.
Ibi byatumye DIS yakira miliyoni 15 z'amapawundi kuri miliyoni 50 FC Barcelona yari yatanze.
Umunyamategeko wa DIS yagize ati:"Ntabwo Neymar yagurishijwe ku makipe yatangaga amafaranga menshi. Hari amakipe yatangaga miliyoni 60 z'amayelo."
Ni mu gihe umunyamategeko wa Neymar Jr we yireguye avuga ko kuba umukinnyi yava mu ikipe imwe ajya mu yindi bishingira ku byifuzo bye n'ikipe ashaka kujyamo kandi nayo imushaka.
Amakuru ava muri Esipanye avuga ko aho kuba imyaka itanu n'ihazabu ya miliyoni 130 z'amapawundi, Neymar ashobora gukatirwa igifungo cy'imyaka ibiri n'ihazabu ya miliyoni 8.6 z'amapawundi.
Ndetse hashobora kubaho igifungo cy'imyaka itanu ku wari perezida wa FC Barcelona muri icyo gihe ariwe Sandro Rosell ndetse na FC Barcelona igacibwa miliyoni 7.2 z'amapawundi.
Neymar ukomeza guhakana ibi aregwa uyu ni umunsi wa mbere imbere mu rukiko, biteganyijwe ko ku wa Gatanu aribwo azatanga ibimenyetso.
