Catlo Ancelotti w'imyaka 62 niwe wari uyoboye Real Madrid yatsinze Liverpool igitego kimwe ku busa ku mukino wa nyuma wa Champions league wabereye kuri Stade de France i Paris mu Bufaransa.
Ibi Real Madrid yabifashijwemo n'igitego umunya-Brazil Vinicius Junior yatsinze ku munota wa 59, kikaba ari nacyo cyatandukanyije impande zombi kuri uyu mugoroba.
Ubu uyu mutoza wa Real Madrid yisangije agahigo ko kuba ariwe mutoza rukumbi wabashije gutwara ibikombe bine byose bya UEFA Champions league, aho yasize Bob Paisley watoje Liverpool na Zinedine Zidane bose batwaye ibikombe bitatu Champions league.
Ancelotti yafashije Real Madrid kwegukana Champions league ya 14(Image:The Guardian)
Nyuma y'uyu mukino Ancelotti yabwiye BT Sport ati:"Ndi umugabo w'agahigo. Nagize amahirwe yo kuza hano mu mwaka ushize kandi ngira umwaka w'imikino mwiza cyane. Ikipe nziza, abakinnyi beza bafite ubuhanga no mu mutwe hakomeye."
Carlo Ancelotti yatwaye Champions league ya kane mu gihe yakinnye imikino ya nyuma inshuro eshanu, ariko imwe yatsinzwe na Liverpool mu mukino w'amateka mu 2005 ubwo yatozaga AC Milana.
Carlo Ancelotti yatwaye Champions league ebyiri muri AC Milan mu 2003 no mu 2007, ndetse atwara izindi ebyiri muri Real Madrid mu 2014 ndetse n'iyo yaraye atwaye.
