Joe Boy yihakanye Davis D uvuga ko bafitanye indirimbo

Joe Boy yihakanye Davis D uvuga ko bafitanye indirimbo

 Dec 3, 2022 - 09:00

Umuhanzi Joe Boy uri mu Rwanda, yahakanye amakuru yo gukorana indirimbo na Davis D wari wabivuze.

Umunya Nigeria Joseph Akinwale wamamaye mu muziki nka Joe Boy uri mu Rwanda aho yitegura gutaramira abari bwitabire igitaramo “Kigali Fiesta” giteganyijwe kuri uyu wa Gatandatu tariki 03 Ukuboza agahuriramo n’abandi bahanzi nyarwanda batandukanye, yahakanye amakuru Davis D yatangaje ko bafitanye indirimbo.

Joe Boy yahakanye aya makuru ubwo yari mu kiganiro n’itangazamakuru gitegura igitaramo cyabaye ku munsi w’ejo muri ParkInn Hotel iherereye mu Kiyovu.

Joe Boy abajijwe ku mafoto yagiye hanze 2020 ari kumwe n’umuhanzi nyarwanda Davis D ndetse byanavuzwe ko bakoranye indirimbo, Joeboy yavuze ko atazi uwo muhanzi ndetse ko atibuka akorana umushinga nawe.

Umunyamakuru yabajije Joeboy ati “hari amafoto yagaragaye uri kumwe n’umuhanzi Davis D ndetse bivugwa ko umushinga w’indirimbo warangiye ?”

Joeboy yahakanye ayo makuru, mu bitwenge byinshi ati  “Ntabwo nibuka nkorana umushinga w’indirimbo n’uwo muhanzi”.

Nyuma y’uko Joeboy ahakanye ibi, abantu bahise bibuka ubwo Davis D yabwiraga ikinyamakuru INYARWANDA ko yamaze gukorana indirimbo n’uyu munya Nigeria.

Icyo gihe Davis D yavuze ko yamutembereje muri Studio afite iwe mu rugo bakaganira birambuye kandi ko Joeboy yavuye muri Nigeria akunda indirimbo “Dede” iri mu zakunzwe cyane za Davis D.

Ibyo bigaherekezwa n’ifoto yabo bombi bahuje urugwiro.

Reba Reba ikiganiro Joe Boy yagiranye n’itangazamakuru.