Ni umukino wa nyuma buri mukunzi wa ruhago ku isi yakwifuza kureba bitewe n'uko ugiye guhuza amakipe yombi akomeye yaba ku mazina kubera ibikombe yatwaye, abakinnyi afite aka kanya, abatoza bayatoza ndetse n'umwaka w'imikino yagize kuri buri ruhande.
Uyu mukino uzatangira ku isaha ya saa 21:00 kuri Stade de France i Paris isanzwe yakira abantu ibihumbi 75,000 bicaye neza. Aha ni ibikombe 19 bya UEFA Champions league bizaba bihurira mu kibuga, 13 bya Real Madrid na 6 bya Liverpool.
Mu rwego rwo kugabanya ibibazo muri uyu mukino, uzaba uyobowe n'umufaransa w'imyaka 40 witwa Clement Turpin uzwiho gutanga amakarita make mu mukino nyuma y'uko aba yabanje kuganira n'abakinnyi abihanangiriza inshuro nyinshi.
Uyu mugabo aheruka gusifura imikino itatu mu marushanwa ya UEFA uwahuje Chelsea na Real Madrid, Sevilla na West Ham United ndetse n'uwahuje Borussia Dortmund na Rangers. Muri iyi mikino amakarita Clemet Turpin yatanazemo, ku mpuzandengo ni amakarita 2.3 muri buri mukino.
Clement Turpin niwe uzasifura uyu mukino(Net-photo)
Ibigwi by'aya makipe muri UEFA Champions league
Mu nshuro 16 Real Madrid imaze kugera ku mukino wa nyuma wa UEFA Champions league, imaze gutsindwamo inshuro eshatu gusa. Ubwo iyi kipe iheruka gutsindwa ni mu mukino wabereye mu Bufaransa i Parc des Princes mu mwaka w'imikino 1980-81, aho Liverpool ariyo yayitsinze igitego kimwe ku busa. Kuva icyo gihe Real Madrid imaze kugera ku mukino wa nyuma inshuro zirindwi ndetse hose yabashije gutwara igikombe.
Imikino ya Nyuma Real Madrid imaze gukina ya Champions league:
1955-56 - Real Madrid 4-3 Reims (Parc des Princes)
1956-57 - Real Madrid 2-0 Fiorentina (Santiago Bernabeu)
1957-58 - Real Madrid 3-2 AC Milan AET (Heysel Stadium)
1958-59 - Real Madrid 2-0 Reims (Neckarstadion)
1959-60 - Real Madrid 7-3 Eintrancth Frankfurt (Hampden Park)
1961-62 - Benfica 5-3 Real Madrid (Olympisch Stadion)
1963-64 - Inter Milan 3-1 Real Madrid (Praterstadion)
1965-66 - Real Madrid 2-1 Partizan (Heysel Stadium)
1980-81 - Liverpool 1-0 Real Madrid (Parc des Princes)
1997-98 - Real Madrid 1-0 Juventus (Amsterdam Arena)
1999-00 - Real Madrid 3-0 Valencia (Stade de France)
2001-02 - Real Madrid 2-1 Bayern Leverkusen (Hampden Park)
2013-14 - Real Madrid 4-1 Atletico Madrid AET (Estadio da Luz)
2015-16 - Real Madrid 1-1 Atletico Madrid [5-3 on penalties] (San Siro)
2016-17 - Real Madrid 4-1 Juventus (Millennium Stdium)
2017-18 - Real Madrid 3-1 Liverpool (NSC Olimpiyskiy Stadium)
Ku ruhande rwa Liverpool yo imaze kugera ku mukino wa nyuma inshuro ikenda hatabariwemo iyi nshuro, ikaba yaratwayemo ibikombe bitandatu byose.
Imikino ya nyuma Liverpool imaze gukina ya Champions league:
1976-77 - Liverpool 3-1 Borussia Monchengladbach (Stadio Olimpico)
1977-78 - Liverpool 1-0 Club Brugge (Wembley Stadium)
1980-81 - Liverpool 1-0 Real Madrid (Parc des Princes)
1983-84 - Liverpool 1-1 Roma [4-2 on penalties] (Stadio Olimpico)
1984-85 - Juventus 1-0 Liverpool (Heysel Stadium)
2004-05 - Liverpool 3-3 AC Milan [3-2 on penalties] (Ataturk Olympic Stadium)
2006-07 - AC Milan 2-1 Liverpool (Olympic Stadium)
2017-18 - Real Madrid 3-1 Liverpool (NSC Olimpiyskiy Stadium)
2018-19 - Liverpool 2-0 Tottenham Hotspurs (Metropolitano Stadium)
Imwe muri iyi mikino amakipe yombi yayikinnye irushanwa rikitwa European cup, mbere y'uko mu mwaka w'imikino 1992-93 itangiye kwitwa UEFA Champions league n'ubwo ibyo bikombe byose babibara nka Champions league.
Iyo yahuye biba bimeze bite?
Mu myaka ya vuba aha Liverpool yagiye iba insina ngufi cyane imbere ya Real Madrid kuko yagiye iyibabaza inshuro nyinshi kandi ikayitsinda ibitego byinshi.
Imikino itanu iheruka guhuza aya makipe nta mukino n'umwe Liverpool yabashije gutsinda kuko Real Madrid yatsinze imikino ine bakanganya umukino umwe. Uteranyije iyi mikino wasanga Real Madrid yaratsinze Liverpool ibitego 10-3.
Real Madrid yigaruriye Liverpool (Image:Sportskeeda)
Imimerere yayo mu kibuga muri uyu mwaka w'imikino.
Ni amakipe yombi ahurira ku buryo bumwe bw'imikinire bwa 433, aho ba myugariro bane baba bari imbere y'umunyezamu, hakaba abakinnyi bo hagati batatu, ndetse n'abataka batatu bashakira ikipe ibitego.
Muri uyu mwaka w'imikino Real Madrid ni ikipe yaranzwe cyane no kwigaranzura amakipe mu mikino ikomeye(Come back) ikabasha gutsinda umukino nyamara yabanje gutsindwa. Gusa ibi Liverpool nayo ibifitemo uburambe kuko yabikoze inshuro nyinshi dore ko mu mwaka w'imikino wa Premier league urangiye Liverpool ariyo kipe yabonye amanota menshi aho yagiye itsinda umukino nyamara yabanje gutsindwa. Liverpool yabonye amanota 20 yose yakuye mu mikino yatsindaga yabanje gutsindwa.
Muri uyu mwaka w'imikino Liverpool yagaragaje imbaraga zikomeye cyane mu gutsinda ibitego bivuye ku mipira y'imiterekano. Muri Champions league y'uyu mwaka iyi kipe ya Jurgen Klopp yatsinze ibitego umunani biva muri iyi mipira y'imiterekano, harimo bine byavuye kuri koruneri.
Bivuze ngo guha koruneri nyinshi iyi kipe ya Jurgen Klopp ni nko kongera umwanzi intwari ku rugamba, ibi bikazatuma ubwugarizi bwa Real Madrid bukinana ubwitonzi bwinshi.
Ni mu gihe kandi Real Madrid nayo yagaragaje imbaraga zikomeye cyane mu gutsinda ibitego mu gice cya kabiri cy'umukino, cyane cyane mu minota ya nyuma y'umukino. Ibi Real Madrid yabigaragaje cyane mu mikino yo gukuranwamo aho yakuyemo PSG, Chelsea ndetse na Manchester City.
Imibare igaragaza ko mu bitego 28 Real Madrid yatsinze muri Champions league, 20 byose yabitsinze ari mu gice cya kabiri cy'umukino.
Muri uyu mwaka w'imikino Liverpool imaze gutwara ibikombe bibiri byose ibitwaye kuri penariti. Mu gihe Real Madrid yaba iretse uyu mukino ukagera aho amakipe yombi atera penariti, amahirwe menshi yaba ahengamiye kuri Liverpool.
Ibibazo by'imvune mu makipe:
Muri Real Madrid bameze neza cyane dore ko iyi kipe yanegukanye igikombe cya shampiyona hakiri kare bigatuma Carlo Ancelotti atangira kuruhutsa inkingi ze za mwamba hakiri kare.
Muri Liverpool ho hashize iminsi harimo ubwoba kuri Mohamed Salah wagize ikibazo ku mukino wa nyuma wa FA Cup, Thiago Alcantara, Virgil Van Dijk na Fabinho bari bagize ibibazo mu minsi ishize, hari ikizere ku rwego rwo hejuru ko bazakina uyu mukino kandi bameze neza.
Ikipe ihabwa amahirwe menshi yo gutsinda.
Abenshi bahuriza ku kuba Liverpool ari ikipe nziza kurusha Real Madrid uko zimeze muri uyu mwaka w'imikino, dore ko Liverpool yatsinze ibitego bigera kuri 90 muri Premier league mu gihe Real Madrid yatsinze ibitego bigera kuri 80 La liga.
Gusa ibi ntibihagije ngo byemezwe ko uyu mukino uri mu biganza by'abahungu ba Jurgen Klopp kuko n'amakipe atatu Real Madrid iheruka gukuramo, yose yabaga ahabwa amahirwe kurusha Real Madrid.
Aba-pundits bakomeye ku isi bavuze iki?
Michael Owen ukorera BT Sports akaba yaranakiniye aya makipe yombi we yatangaje ko abona Liverpool ari nziza kurenza Real Madrid, ndetse avuga ko ishobora gutsinda uyu mukino ibitego 3-1 cyangwa 3-0.
Jamie Carragher wa Sky Sports akaba yaranabaye umukinnyi wa Liverpool, we avuga ko no kuba Real Madrid yarageze ku mukino wa nyuma ari ku bw'amahirwe kuko imikino myinshi yagiye iyitsinda ihangayitse kuko yabaga yarushijwe cyane. Ni mu gihe kandi Gary Neville(yakiniye Manchester United) ukunze kuba ari kumwe na Jamie Carrager kuri Sky Sports we avuga ko aha Real Madrid cyane yo gutwara iki gikombe, ahanini bitewe n'abakinnyi ifite hagati mu kibuga yaba Casemiro, Kroos na Modric babanzamo, ndetse na Valverde na Camavinga basimbura.
