Ikipe ya Manchester United ikomeje kwitegura umukino wa kimwe cya munani cya champions league uzayihuza na Atletico Madrid mu cyumweru gitaha.
Myugariro w'umwongereza Luke Shaw aremeza ko ashobora kwitwa ikigoryi kubera ko yizera ko Manchester United akinira ishobora kwegukana champions league muri uyu mwaka w'imikino.
Uyu musore ukinira ikipe y'igihugu y'Ubwongereza yizera ko abahungu bayobowe na Ralf Rangnick mu kwezi kwa gatanu bashobora kuzaba bari i St Petersburg ku mukino wa nyuma wa UEFA champions league.
Luke Shaw yagize ati:"Iki ni igihe cyo gukora cyane mu mwaka w'imikino kandi ni ngombwa cyane mu irushanwa kuguma kuri gahunda. Nk'ikipe twizera ko dushobora gutwara champions league.
"Si abantu benshi hanze aha babitekereza kandi bamwe baratekereza ko ndi ikigoryi kubera kuvuga ibyo ariko dufite uko kwizera kandi twifitiye icyizere ko twabikora.
"Nizeye neza ko abantu bose bari mu rwambariro - abakinnyi n'abayobozi - bose bizeye ko twabikora. Ubu dukeneye gukomeza kuzamura umwuka, tukabona intsinzi ndetse dukomeza gukina neza."
Ikipe ya Manchester United iherutse gutsinda Brighton&Hove Albion kuri uyu wa kabiri mu gihe yari imaze itatu yose nta ntsinzi. Umutoza Ralf Rangnick ari kugerageza gusubiza iyi kipe ku murongo ariko ntibirakunda.
Nyuma y'imyaka ine nta gikombe itwara, ubu amahirwe Manchester United isigaranye uyu mwaka ni champions league gusa kuko FA cup n'igikombe cya shampiyona amahirwe yayo yayoyotse.
Luke Shaw yizera ko Manchester United yatwara champions leagu(Net-photo)
