Ikipe ya Manchester United iherutse kwemeza ko umudage Ralf Rangnick ariwe mutoza ugiye kuyitoza kugeza mu mpeshyi ya 2022.
Uyu mugabo rero mu rwego rwo kubaka ikipe ye ntiyatinze kuko hari umukinnyi yahise asaba uri mu ikipe yatoje ariyo ya RB Leipzig yo mu Budage.
Ubu abantu bo muri Manchester United bagiye kureba neza umusore wa RB Leipzig witwa Amadou Haidara ukina hagati mu kibuga mu mikino ibiri igiye gukurikiraho ngo harebwe ko yagurwa mu kwa mbere.
Amadou Haidara umunya Mali ukinira RB Leipzig(Image:Sky sports)
Uyu musore w'imyaka 23 n'ubundi ni Ralf Rangnick wamusinyishije muri iyi kipe ya RB Leipzig ubwo yamukuraga muri Red Bull Salzburg mu 2018.
Iyi kipe iri gushaka umukinnyi wo hagati cyane,biteganyijwe ko baramureba mu mukino RB Leipzig ifitanye na Union Berlin kuri uyu wa Gatanu ndetse n'umukino bafitanye na Manchester City muri Champions League.
Amadou Haidara amaze gukinira RB Leipzig imikino 100 ndetse bikaba bizwi neza ko ari umufana wa Manchester United ndetse afite inzozi zo kuyikinamo nk'uko we ubwe abitangaza.
Amadou Haidara ni umukinnyi wo hagati mu kibuga ukina yugarira ndetse mu mwaka ushize ubwo RB Leipzig yatsindaga Manchester United ibitego 3-2 yatsinze igitego.
Haidara yatsinze Manchester United igitego(Image:Getty)
Haidara amaze gukina imikino 24 mu ikipe ye y'igihugu ya Mali bikaba bivugwa ko kuri miliyoni 33 z'amapawundi uwamushaka yamubona.
Umutoza Ralf Rangnick amakuru akomeza kuvuga ko ubu ariwe mukinnyi wa mbere ashaka gusinyisha muri Manchester United ubwo isoko rizaba rifunguwe mu kwa mbere.
Ralf Rangnick araza gutangira gutoza Manchester United ku mukino ifitanye na Arsenal muri shampiyona ku wa kane muri iki cyumweru.
