Mu ijoro ryo kuri uyu wa kane nibwo ku mugabane w'uburayi hakinwaga imikino ya kamarampaka mu gushaka amakipe atatu agomba kwiyongera ku makipe icumi yamaze kuboneka, ubundi agahagararira uyu mugabane mu gikombe cy'isi kizabera muri Qatar.
Icyari gitegerejwe ahanini ni ikipe y'igihugu ya Portugal n'Ubutariyani kuko iyo aya makipe yose arenga ikiciro cya mbere yari kuzakina ku wa kabiri, hakamenyekana ikipe imwe muri izo ijya mu gikombe cy'isi.
Portugal yari yakiriye Turkey iwayo ndetse ukaba nawo ari umukino utari woroshye. Ikipe y'igihugu ya Portugal yaburaga abakinnyi barimo Renato Sanchez, Pepe, Ruben Neves, Joao Cancelo na Ruben Dias ariko ntibyayibujije gutsinda Turkey.
Ni umukino warangiye Portugal itsinze Turkey ibitego 3-1. Ibitego bya Portugal byatsinzwe na Otavio, Diogo Jota na Matheus Nunes. Igitego kimwe cya Turkey cyo cyatsinzwe na rutahizamu Burak Yilmaz usanzwe akinira Lille yo mu Bufaransa.
Gusa ku rundi ruhande ikipe y'igihugu y'Ubutariyani byari buitezwe ko izahura na Portugal, yo yasezerewe hakiri kare. Abatariyani batsindiwe iwabo na North Macedonia igitego kimwe ku busa cyaje mu minota y'inyongera gitsinzwe na Aleksandar Trajkovski.
Abatariyani bagerageje amashoti 32 muri rusange ndetse biharira umupira ku kigero cya 64 ku ijana, ariko birangira batsinzwe igitego kimwe ibyiringiro byo kujya my gikombe cy'isi bihita birangira kuko babuze itike mu bikombe by'isi bibiri bikurikirana.
Indi mikino yabaye, Wales yatsinze Austria 2-1, Sweden itsinda Czech Republic 1-0, umukino wa Ukraine na Scotland wo washyizwe mu kwa gatandatu kubera ibibazo Ukraine irimo, naho Poland yari gukina n'Uburusiya ariko Poland yahise ikomeza kuko Uburusiya bwahagaritswe kubera gutera Ukraine.
Ku wa kabiri nibwo hazakinwa imikino ya nyuma aho Portugal izakina na North Macedonia, Poland ikine na Sweden mu gihe Wales izategereza izatsinda hagati ya Ukraine na Scotland. Amakipe atatu azatsinda iyi mikino azahita abona itike yo kujya mu gikombe cy'isi kizabera muri Qatar.
Portugal yatsinze Turkey
