Kuri uyu wa Gatanu tariki ya 21 Mata 2023, nibwo urukiko mu Burusiya rwasohoye impapuro zo guta muri yombi umuyobozi ukuriye ubutasi muri Ukraine Kyrylo Budanov.
Ku bw'ibyo, uru rukiko rwa Moscow rukaba rushinja uyu musirikare mukuru Kyrylo Budanov ibikorwa by'iterabwoba byabereye imbere mu Burusiya bikozwe n'ubutasi bwa Ukraine akuriye, akaba ari nawe ubwe wabyiteguriye.
Ibinyamakuru by'imbere mu Burusiya birimo RIA, byatangaje ko Budanov ashinjwa ibyaha by'iterabwoba ndetse na magendu y'intwaro mu Burusiya.
Kuri iyi mpamvu ikigo cy'ubutasi mu Burusiya Federal Security Service (FSB) cyivuga ko uyu mugabo ariwe wateguye igitero cyagabwe ku kiraro cyo muri Crimea mu Kwakira 2022.
Umuyobozi ukuriye ubutasi muri Ukraine Kyrylo Budanov arasibirwa kujyanwa mu gihome na Moscow
Ikindi kandi Budanov arashinjwa gutegura igitero cyahitanye Umunyamakurukazi Darya Aleksandrovna Dugina uzwi nka Daria Platonova.
Nkaho ibyo bidahagije, uyu mugabo kandi arashinjwa gutegura ikindi gitero cyahitanye umusirikare w'Umurusiya mu mugi wa St Petersburg Maxim Fomin uzwi nka Vladlen Tatarsky mu minsi ishize.
Kuri izi mpamvu zose rero, urukiko mu Burusiya rwasabye ko uyu mugabo ajyanwa mu rukiko akaryozwa ibyo yakoze cyane ko mu Burusiya batangaza ko biriya byose byabaye ari ibikorwa by'iterabwoba.
