Intambara ishyamiranyije u Burusiya na Ukraine ishyigikiwe n'u Burengerazuba bw'isi magingo aya Ukraine iri kugaragaza ibimenyetso by'uko yatangije ibitero byo kwigaranzura u Burusiya nubwo yo ivuga ko itazigera itangaza ko yatangije ibyo bitero.
Amakuru ari mu binyamakuru byo mu Burengerazuba bw'isi saha izi ni uko Ukraine yagabye igitero mu gace ka Kaluga kari mu majyaruguru ya Moscow.
Iby'iki gitero byemejwe na Guverineri wa Kaluga, Vladislav Shapsha abicishije ku rubuga rwa Telegram.
Yatangaje ko dorone imwe yaguye mu cyaro cya Strelkovka naho indi igwa mu ishyamba mu gice cya Medynsky.
Guverineri Vladislav Shapsha akaba yatangaje ko nta muntu wahakomerekeye cyangwa ngo ahasige ubuzima. Icyakora yavuze ko hangiritse ibintu bike.
Nubwo Guverineri Shapsha yatangaje ibi ngibi, ibiro ntaramakuru by'Abongereza Reuters dukesha iyi nkuru byanditse ko bitabashije gukora igenzura ryigenga ngo bemeze niba koko izi dorone zarashwe.
Tugarutse gato kuri bya bitero bya Ukraine byo kwigaranzura u Burusiya, Dmitry Medvedev Umujyanama wungirije mu by'umutekano mu Burusiya, aratangaza ko Ukraine ari ugukabya nta bushobozi ifite bwo kwisubiza ibice u Burusiya bwafashe.
Ni mu gihe mu minsi mike ishize Perezida Vladimir Putin aheruka gutangaza ko Ukraine yatangije ibitero yakomeje kuvuga ariko ngo yasanze ingabo zabo zihagaze neza zikabasha kubisubiza inyuma.
