Iminsi 643 irashize Ukraine ishyigikiwe n'u burengerazuba bw'isi irwana n'u Burusiya, aho magingo aya ingabo z'u Burusiya ziri gutera intambwe mu bice byose byo burasirazuba bwa Ukraine by'umwihariko mu mugi wa Adviivka wabaye isibaniro muri ibi bihe.
Vitaliy Barabash umuyobozi w'ingabo mu mugi wa Adviivka ku ruhande rwa Ukraine, akaba yatangaje ko ingabo z'u Burusiya ziri gusunika iza Ukraine mu buryo bukomeye.
Ibi biri kuba nyuma yuko Ramzan Kadyrov umuyobozi w'abarwanyi baba-Chechen bo mu Ntara Chechnya mu Burusiya yohereje abarwanyi bashya ibihumbi 3,000 aho muri Adviivka.
Abarwanyi bo muri Chichnya bongeye kwisuka muri Adviivka Ukraine ikuka umutima
Kadyrov akaba atangaza ko guhera intambara yatangira abarwanyi be barenga ibihumbi 26,000 bamaze kugera muri Ukraine barimo 12,000 b'abakorerabushake, ndetse n'abandi ibihumbi 7,000 bahoraho. Aba-Chechen bakaba ari bamwe mu barwanyi karahabutaka barwana ku ruhande rw'u Burusiya.
Ku rundi ruhande, Perezida w'u Burusiya Vladimir Putin akaba yemeje ko ingengo y'imari ishorwa mu gisirikare yongerwaho 30% ndetse akaba yemeje ko bizagera mu mwaka utaha imaze kugera kuri 40%. Ibinyamakuru byo mu burengerazuba bw'isi bikaba bivuga ko iyi ngengo y'imari ishora no kuzageza kuri 70% mu 2024.
Perezida Vladimir Putin yasinye ko ingengo y'imari ya gisirikare yongerwaho 30%
Hagati aho, mu gihe imirwano ikomeje, imyuzure na yo ntiyoroheye ibi bihugu byombi birwana, dore mu bice bya Donesk, Kherson, na Crimea imyuzure imeze nabi.
Iyo myuzure ikaba yatumye umuriro ubura mu bice bigari byo muri Donbass ndetse abantu 10 bamaze gupfa muri Ukraine nk'uko Ihor Klymenko Minisitiri w'umutekano imbere mu gihugu abyemeza aho muri Ukraine.
