Nyuma y'amakipe ane yari yaramaze kumenyekana ko yageze muri kimwe cya kane cya UEFA champions League 2021-2022, kuri uyu wa kabiri hari hateganyijwe imikino ibiri yagombaga kwerekana andi makipe abiri yerekeza muri 1/4.
Ikipe ya Manchester United yari yakiriye Atletico Madrid i Old Trafford, nyuma y'uko mu mukino ubanza aya makipe yombi yari yanganyije 1-1 kuri stade Wanda Metropolitano ya Atletico Madrid.
Manchester United yari yakiriye uyu mukino ifite akamwenyu kuko yaherukaga gutsinda Tottenham mu mpera z'icyumweru gishize, aho yafashijwe na Cristiano Ronaldo wari watsinze ibitego bitatu byose.
Ralf Rangnick utoza Manchester United yari yahisemo abakinnyi 11 babanzamo aribo:"David de Gea, Diogo Dalot, Alex Telles, Harry Maguire, Raphael Varane, Scott McTomnay, Fred, Bruno Fernandes, Antony Elanga, Jadon Sancho na Cristiano Ronaldo.
Diego Simeone utoza Atletico Madrid nawe yari yahisemo abakinnyi babanza mu kibuga aribo:Oblak, Llorente, Lodi, Reinildo, Savic, Herera de Paul, Koke, Griezmann na Joao Felix.
Ni umukino waranzwe nuko Manchester United yihariye umupira cyane ariko igihe Atletico Madrid izamukiye ikarema uburyo buteye ubwoba imbere y'izamu, hari n'igitego iyi kipe yatsinze kirangwa kuko habayeho kurarira.
Atletico Madrid yongeye kubona uburyo bwiza ku munota wa 41, Renan Lodi ukina inyuma ku ruhande rw'ibumoso atsinda igitego ku mupira mwiza wari uhinduwe na Antoine Griezmann. Gusa aha abafana ba Manchester United ntibanyuzwe kuko Elanga yari yakorewe ikosa mbere yo gutsindwa iki gitego, ariko umusifuzi ntasifure.
Mu gice cya kabiri Manchester United yarushijeho gushaka igitego ndetse izana abakinnyi nka Rashford, Pogba, Mata, Cavani na Matic ariko igitego kirabura birangira isezerewe ku giteranyo cy'ibitego 2-1.
Aha bivuze ko mu mikino ya 1/4 tutazabona Cristiano Ronaldo na mugenzi we Lionel Messi bazwi nk'abanyabigwi cyane cyane muri iri rushanwa, dore ko aribo bafitemo ibitego byinshi kuva ryatangira gukinwa.
Undi mukino wabereye kuri stade ya Juan Cruijff Arena aho ikipe ya Ajax yo mu Buhorandi yari yakiriye Benfica yo muri Portugal. Umukino ubanza warangiye ari ibitego 2-2, ndetse kuri uyu munsi niyo Ajax yahabwaga amahirwe cyane.
Gusa Benfica yatunguranye ijya gutsindira Ajax iwayo, aho yabonye igitego ku munota wa 77 gitsinzwe na rutahizamu w'umunya-Uruguay Darwin Nunez w'imyaka 22.
Kuri uyu wa gatatu hateganyijwe indi mikino ibiri ya nyuma ya 1/8, aho Juventus irakira Villarreal zanganyije 1-1 mu mukino ubanza. Ndetse Lille irakira Chelsea, umukino ubanza Lille yatsinzwe na Chelsea ibitego 2-0.
Aha haramenyekana amakipe ajya muri 1/4 asanzeyo Bayern Munich, Real Madrid, Manchester City, Liverpool, Benfica na Atletico Madrid.
Renan Lodi niwe watsindiye Atletico Madrid(Net-photo)
Atletico Madrid yasezereye Manchester United(Net-photo)
Ikipe ya Benfica yabonye itike ya 1/4(Net-photo)
