Kuri iki Cyumweru nibwo ikipe ya FC Barcelona yatsinzwe na Real Madrid ibitego 3-1 mu mukino wa El Clasico uba utegerejwe na benshi ku isi bafana aya makipe abiri yo muri Esipanye.
FC Barcelona isanzwe yambara "Spotify" imbere ku mipira yayo, ariko kuri uyu mukino havuyeho Spotify hajyaho ishusho y'igihunyira kikaba ari ikirango cya kompanyi ya Ovo(October's Very Own) y'umuhanzi Aubrey Drake Graham uzwi cyane ku izina rya Drake.
Ikirango cya Drake cyasimbujwe Spotify(Net-photo)
Kuki FC Barcelona yari yambaye ikirango cya Drake?
Muri uyu mwaka w'imikino 2022-2023 nibwo FC Barcelona yatangiye gukorana na kompanyi ya Spotify icuruza imiziki, bakaba bayambara ku myenda yabo ndetse na sitade ya Barcelona ikaba isigaye yitwa Spotify Camp Nou.
Umuhanzi Drake aherutse guca agahigo ko kuba ariwe muhanzi wa mbere wabashije kumvwa(Views) inshuro miliyari 50 kuri Spotify uteranyije ibihangano bye byose kuri uru rubuga, nuko Spotify nayo ihitamo kumushimira inyuze muri FC Barcelona bakorana.
Icya mbere cyakozwe ni uko ubwo abakinnyi ba FC Barcelona barimo bishyushya bari bambaye imyenda yanditseho Spotify imbere nk'ibisanzwe, ariko inyuma hakazaho izina Drake n'umubare 50 uhagarariye izo views yagize.
Ikindi cyakozwe n'ugufata ikirango cya kompanyi ya Ovo y'umuhanzi Drake(Igihunyira) bakagisimbuza ahajyaga ijambo Spotify ku myenda bakinanye umukino bagombaga gukina na Real Madrid.
Abafana ba FC Barcelona barahangayitse.
Abafana b'ikipe ya FC Barcelona bakimara kumenya iby'aya makuru y'uko ikipe yabo izakina na Real Madrid ifite icyo kirango cya Drake, bahise batangira kugira ubwoba bw'uko ikipe yabo izatakaza uwo mukino bitewe n'ivivugwa kuri uyu muhanzi.
Uyu mugabo ukunzi guhura n'abakinnyi batandukanye kubera ko nawe akunda imikino, amaze kwizerwa nk'umuteramwaku ku bakinnyi baba bahuye mbere yo kujya mu mukino kuko bimaze kugaragara ko akenshi batsindwa.
Nk'uko byari byitezwe n'abafana bamwe bari bamaze gucika intege, FC Barcelona byarangiye itsinzwe na Real Madrid ibitego 3-1 byatsinzwe na Karim Benzema, Fede Valverde na Rodrygo mu gihe icya FC Barcelona cyatsinzwe na Ferran Torres.
Uyu muvumo wa Drake waje ute?
Umunyarwanda yarateruye aravuga ati:"Ntakabura imvano!". N'ubwo utakwemeza ko ibi ari uyu muhanzi uba wabiteye, ariko hari ingero nyinshi z'abakinnyi bagiye bicuza kuba bahuye n'uyu muhanzi mbere yo gukina imikino yabo dore ko imyinshi yabaga inakomeye.
Bitera ikikango benshi iyo babonye Drake yifotozanyije n'umukinnyi, iyo babonye yambaye umwambaro w'ikipe, iyo atangaje mu ruhame ko ashyigikiye ikipe, n'iyo yayitegeye muri betting.
Mu 2019 ikipe ya AS Roma yanyuze ku mbuga nkoranyambaga zayo itangaza ko bibujijwe ku bakinnyi bayo kuba bakwifotozanya n'uyu muhanzi, n'ubwo benshi babifashe nko gutebya.
Sergio Aguero, Jadon Sancho, Layvin Kurzawa, Pierre-Emerick Aubameyang, Paul Pogba, n'abandi ni bamwe mu bakinnyi bumvise ku cyanga cy'itsinzwi nyuma yo guhura n'umuhanzi Drake.
Bamwe mu bakinnyi n'amakipe bagiye bahura n'uruva gusenya bigashinjwa Drake.
Mu 2019 ikipe ya PSG yatsinzwe na Lille ibitego 5-1. Ni ubwa mbere iyi kipe yari itsinzwe ku buryo bukomeye cyane mu myaka 19 ishize. Ibi byabaye nyuma y'uko uwari myugariro wa PSG witwa Lyvin Kurzawa yari yagaragaye mu ifoto yari yafatanye na Drake.
Lyvin Kurzawa yari yagaragaye yifotozanya na Drake
Nanone mu 2019 nyuma y'ifoto yakwirakwijwe henshi ku mbuga nkoranyambaga ya Sergio Aguero na Drake, Manchester City yari ifitanye umukino na Tottenham muri ¼ cya UEFA Champions league.
Muri uyu mukino byarangiye rutahizamu Sergio Aguero wa Manchester City ahushije penariti ndetse biza kurangira iyi kipe isezerewe muri UEFA Champions league.
Umwongereza Jadon Sancho nawe mu 2019 ikipe ye ya Borussia Dortmund yanyagiwe na Bayern Munich ibitego 5-0 nyuma yo kwifotozanya na Drake.
Gusa dushobora kugaruka mu mupira w'amaguru ugasanga higanjemo umwaka wa 2019, ariko urebye no mu yindi mikino byatangiye hambere. Mu 2015 icyamamarekazi mu mukino wa Tennis, Serena Williams, yatsinzwe bitunguranye na Roberta Vinci muri ½ muri US Open nyuma y'ibihe yari yagiranye na Drake.
Mu Ukwakira 2021 Drake yagaragaye yifotozanya n'umunya-Canada Alphonso Davies ukinira Bayern Munich, nyuma y'aho Bayern Munich ihita itsindwa na Bayern Leverkusen ibitego 5-1.
Ese ibyo Drake ashinjwa niwe nyirabayazana?
Izi ni ingero nkeya muri nyinshi abakunzi b'imikino itandukanye ku isi baheraho bavuga ko Drake ari icyago udakwiye kwikururira mu gihe uri umukinnyi cyangwa ikipe runaka.
Mu by'ukuri ntawahita yanzura koko niba Drake afite umuvumo agendana muri siporo, dore ko hari n'igihe ibintu biba bihurirana. Drake ni umwe mu bahanzi bakomeye ku isi cyane cyane mu njyana ya Hip-hop bigaragazwa n'ibihembo bitandukanye yagiye atwara kuva yatangira umuziki mu 2001.
