Minisitiri w'ingabo mu Burusiya Sergei Shoigu, kuri uyu wa kabiri tariki ya 28 Werurwe 2023, yatangaje ko ingabo z'u Burusiya zirwanira mu mazi zakoze imyitozo ihambaye.
Sergei Shoigu akaba yavuze ko amato yabo y'intambara ari mu nyanja y'u Buyapani ariyo yakoze imyitozo yo kurasa misile muri iyo nyanja.
Byatangajwe ko bakoze imyitozo yo kurasa misile zidasanzwe za supersonic anti-ship cruise missiles, izi zikaba ari misile zikumira ibisasu byaraswa ku bwato bwabo.
U Burusiya bwakoze imyitozo yo kurasa misile zidasanzwe mu nyanja y'u Buyapani
Ikindi kandi bakaba batangaje ko izi misile za Moskit supersonic cruise missiles, zirasa ku ntego mu birometero birenga 1000km, nk'uko Sergei Shoigu yabitangaje.
Izi misile u Burusiya bwarimo bukoresha imyitozo zikaba ari zimwe muri misile za Hypersonic zihuta kuruta ijwi.
Kuri iyi ngingo, Minisitiri w'Ububanyi n'Amahanga w'Ubuyapani Yoshimasa Hayashi, akaba yavuze ko igihugu cye gikomeza gukurikirana neza ibikorwa by'ingabo z'u Burusiya.
Ukraine yakiriye ibifaru yakomeje gusaba
Kera kabaye ibihugu by'u Bwongereza n'u Budage ibifaru karundura bemereye Ukraine mu ntambara n'u Burusiya byageze muri Kyiv.
Oleksii Reznikov Minisitiri w'ingabo muri Ukraine akaba yatangaje ko ibifaru by'Abongereza Challenger 2, n'iby'Abadage Leopard 2 byageze mu gihugu.
Ku rundi ruhande Minisitiri w'ingabo mu Budage nawe akaba yemeje ko icyiciro cya mbere cy'ibifaru bya Leopard 2 byageze muri Ukraine.
Ibifaru bya chellenger 2 na Leopard 2 byageze i Kyiv
Nubwo bimeze gutya, u Burusiya nabwo bukaba butangaza ko bufite ibindi bifaru bya T90M biteye neza nk'ibi byohererejwe Ukraine, bakaba bemeza ko bazabishumika nta kabuza.
Intambara ihuje u Burusiya na Ukraine ishyigikiwe n'u Burengerazuba bw'isi ikaba imaze umwaka urenga irwanwa.
Magingo aya nta kanunu k'ibiganiro by'amahoro, mu gihe n'intsinzi ya gisirikare bigaragara ko izagorana ku mpande zombi.
