Intambara ihuje u Burusiya na Ukraine ishyigikiwe n'Uburengerazuba bw'Isi igeze ku munsi wa 749, aho kuri ubu igisirikare cya Ukraine cyakajije umurego mu ibitero by'indege zitagira abapilote ziri kuyoborwa ku bikorwaremezo by'ingufu imbere mu Burusiya.
Guhera kuri uyu wa Kabiri, ibitero byibasiye ibice bitandukanye byo mu Burusiya birimo St.Petersburg, Belgorod, Ryazan n'ahandi. Mu gitondo cya none, muri iki gice cya Ryazan gihana imbibi n'Umurwa Mukuru Moscow, ibitero byibasiye ibigega bya peterori, aho byemejwe n'ubuyobozi bw'aka gace.
Perezida Vladimir Putin aremeza ko Ukraine ishaka guhungabanya amatora
Minisiteri y'Ingabo mu Burusiya, iravuga ko dorone 58, ari zo zimaze guhanurwa mu bice bitandukanye by'u Burusiya. Muri izo, 30 zarasiwe mu gace ka Voronezh nk'uko Alexander Gusev Guverineri wa kano gace yabitangaje kuri Telegram.
Hagati aho, Perezida w'u Burusiya Vladimir Putin yatangaje ko ibi bitero bya Ukraine, bigamije guhungabanya amatora y'Umukuru w'Igihugu ategerejwe aho mu Burusiya ku wa 15-17 Werurwe 2024, aho nawe azahatana. Ibi akaba yabitangarije ikinyamakuru RIA cyo mu Burusiya.
