Umuririmbyikazi Tiwatope Savage wamenyekanye nka Tiwa Savage mu muziki wo muri Nigeria no mu Isi muri rusange, yahawe ubutumire bwo kuzaririmba mu birori byo kwimika Umwami w'u Bwongereza Charles III.
Ibi birori by'amateka bikaba bitegerejwe ku wa Gatandatu tariki ya 06 Gicurasi 2023, ku Ngoro y'i Bwami ya Westminster Abbey iri i London.
Tiwa Savage akaba aje asanga abandi bazaririmba kuri uyu munsi barimo: Katy Perry, Steve Winwood, DJ Pete Tong, Lang Lang, Lucy, Paloma Faith, Olly Murs n'abandi.
https://www.thechoicelive.com/katy-perry-azitabira-ibirori-byo-kwimika-umwami-wu-bwongereza
Tugarutse ku muhanzi wacu Tiwa Savage, akaba ariwe muhanzi rukumbi wo muri Afurika yo munsi y'Ubutayu bwa Sahara umaze gutumirwa muri ibi birori by'imbonekarimwe.
Ikindi kandi akaba ari we muhanzi wo muri Nigeria uhawe aya mahirwe yo kuririmba muri ibi birori bizaba iminsi itatu yose.
Mu nyandiko yasohowe n'abategura ibi birori, bakaba bavuze ko Tiwa Savage, impamvu ari we bahisemo ari uko afite umwihariko wo kuba muri iyi minsi ari mu bakunzwe cyane kandi ko afite umwihariko mu kuririmba neza.
Nta kabuza ibi birori byo kwimika Umwami Charles III n'umugore we Camilla, bizaba ari akataraboneka, dore ko ibi byamamare bizataramira Abanyacyubahiro barenga ibihumbi 2000.
