FIFA yamaze gutangaza ko ishyirahamwe ry'umupira w'amaguru muri Senegal ryaciwe ibihumbi 180 by'amadorari(asaga miliyoni 180 mu manyarwanda), kubera imyitwarire mibi yaranze abafana babo mu mukino bakinnyemo na Misiri mu gushaka itike yo kujya mu gikombe cy'isi.
Kuri uyu mukino abafana ba Senegal binjiranye amatoroshi y'icyatsi(lasers)muri stade bakajya bayamurika abakinnyi ba Misiri mu maso. Mohamed Salah yahushije penariti, ku rundi ruhande Sadio Mane atsinda iyatumye Senegal igita ibona itike yo kujya mu gikombe cy'isi.
Abakinnyi b'ikipe y'igihugu ya Misiri bamuritswe mu maso
FIFA kandi yavuze ko akanama kayo gashinzwe imyitwarire karebye n'ukuntu abafana ba Senegal binjiye mu kibuga, ndetse n'ibyapa bari bafite byanditseho amagambo atari meza. Senegal kandi yategetswe ko umukino 'irushanwa uzakurikira bazawukina nta bafana bari muri stade.
Si Senegal gusa kandi yahanwe kuko Nigeria nayo ibihano byayigezeho kubera uko bitwaye ubwo iki gihugu cyasezererwaga na Ghana, ku mukino wo kwishyura mu gushaka itike yo kujya mu gikombe cy'isi wabereye muri Nigeria.
Ubwo bari bamaze gutsindwa na Ghana, abafana b'ikipe y'igihugu ya Nigeria biraye mu kibuga bagenda basenya ibintu bitandukanye, ndetse byavuzwe ko hari n'umukozi wa FIFA wahaburiye ubuzima.
Abafana ba Nigeria binjiye mu kibuga basenya(Net-photo)
FIFA yatangaje ko ishyirahamwe ry'umupira w'amaguru muri Nigeria ricibwa ibihumbi 154 by'amadorari ndetse bakazakina umukino umwe nta bafana bari muri stade.
Aka kanama ka FIFA kandi kaciye Repubulika ya Demokarasi ya Congo(RDC) ibihumbi 128 by'amadorari kubera kwitwara nabi ku mukino wabahuje na Maroc mu gushaka itike yo kujya mu gikombe cy'isi, ndetse Lebanon nayo icibwa ibihumbi 103 by'amadorari kubera kwitwara nabi ku mukino wabahuje na Syria, ndetse bose bahabwa umukino umwe azakinira muri stade zambaye ubusa.
