Ikibazo kimaze iminsi mu ikipe y'abari n'abategarugori ya PSG aho uwitwa Aminata Diallo yashinjwaga kugambanira Kheira Hamraoui bakinana kugira ngo amutware umwanya ariko ubu hajemo umugore wa Eric Abidal wahoze ari umukinnyi wa FC Barcelona.
Aminata Diallo washinjwaga ubugambanyi (Image:Marca)
Ubwo Aminata yatwaraga Kheira Hamraoui mu modoka mu ijoro bataha nibwo bahagaritswe n'abagabo bipfutse mu maso babasohora mu modoka bakubita Kheira Hamraoui bamusiga ari intere.
Aminata Diallo byaketswe ko ariwe waba wagambanye kuko we ntacyo yabaye kandi bakina ku mwanya umwe muri PSG bikavugwa ko yashakaga kubona umwanya wo gukina.
Mu minsi ishize nibwo Aminata Diallo yarekuwe na Police ariko ikomeza gukora iperereza ngo harebwe icyaba cyarateye iryo hohoterwa kuri Kheira Hamraoui.
Ubu ikibazo cya Kheira Hamraoui cyakuwe kuri Aminata Diallo bakinana ahubwo ubu harakurikiranwa Hayet Abidal, umugore wa Eric Abidal wahoze akinira FC Barcelona.
Kheira Hamraoui wakubiswe(Image:Marca)
Nk'uko bitangazwa na Le monde uwitwa Eric Abidal nawe agomba guhatwa ibibazo dore ko byagaragaye ko sim card ya Kheira Hamraoui yaba ibaruye ku mazina ya Eric Abidal.
Nk'uko bitangazwa kandi Police izafata umwanya yumve ibyavugiwe kuri telephone ya Kheira Hamraoui dore ko bivugwa ko umugore yaba yarigeze kujya amuhamagara amwihaniza ku mugabo we.
Nk'uko bitangazwa kandi na L'Equipe ngo Kheira Hamraoui we ubwe ngo yaba yarahamagaye Eric Abidal amubaza niba umugore we ntaho yaba ahuriye n'ibyamubayeho.
Eric Abidal n'umugore we Hayet Abidal ushinjwa (Image:GSP)
Uyu Kheira Hamraoui yari muri FC Barcelona y'abari n'abategarugori ubwo Eric Abidal nawe yari umwe mu bagize staff ya FC Barcelona. Bikavugwa ko rero hari umubano baba baragiranye bikarakaza umugore we Hayet Abidal.
Ibi byaba byaratumye Hayet Abidal ashaka kwihorera kuri Kheira Hamraoui dore ko ngo mu gukubitwa kwe umwe muri abo bagabo yaba yarumvikanye avuga ko Hamroui azira kuryamana n'umugabo wubatse.
