Kuri uyu wa Gatanu nibwo inkuru zagiye hanze zemeza ko umudage Torsten Frank Spittler ariwe umutoza mukuru w'Amavubi wamaze kwemezwa nk'umusimbura w'umunya-Espagne Carlos Alôs Ferrer uherutse kuva kuri izi nshingano.
Gusa andi makuru ahari akavuga ko n'ubwo ibiganiro hagati ya FERWAFA n'uyu mugabo bigeze kure, ariko ngo ntabwo barabasha kumvikana 100% ngo abe yakweguririrwa izi nshingano kuko ari gusaba amafaranga menshi.
Muri Kanama 2023 nibwo Carlos Alôs Ferrer wari umutoza mukuru w'ikipe y'igihugu Amavubi yasezeye kuri iyi mirimo, aho akazi ke kabaye gahawe Gerard Buscher usanzwe ari umuyobozi wa tekiniki muri FERWAFA.
Torsten Frank uri mu biganiro na FERWAFA ni umudage w'imyaka 61 umaze imyaka 30 k'ubutoza. Uyu mugabo yabaye umutoza wungirije w'ikipe y'igihugu y'u Budage y'abatarengeje imyaka 16.
Uyu mugabo kandi yatoje ikipe y'igihugu y Nepal n'iya Bhutan, ndetse aba umuyobozi wa tekiniki muri Sierra Leone, Mozambique na Yemen.
Mu kiganiro n'itangazamakuru cyakozwe kuri uyu wa Gatanu kandi, perezida wa FERWAFA Munyantwali Alphonse yijeje abanyarwanda ko mu minsi icumi mbere y'uko Amavubi akina, umutoza mushya azaba yatangajwe.
Ikipe y'igihugu Amavubi iri kwitegura imikino yo gushakisha itike y'igikombe cy'isi cya 2026 aho iri mu itsinda C hamwe na Nigeria, South Africa, Lesotho, Zimbabwe na Benin.
Umukino wa mbere uteganyijwe tariki 15 Ugushyingo 2023, bivuze ko mbere y'aya matariki abanyarwanda bazaba bamenye umutoza mushya w'Amavubi.
Torsten Frank Spittler ashobora kuva umutoza w'Amavubi
