Ikipe ya FC Barcelona iritegura kwakira amafaranga azayifasha kujya ku isoko ry'igura n'igurisha muri iyi mpeshyi, ndetse akaba yayifasha kuva mu cyobo cy'ubukene irimo.
Mu minsi ishize nibwo ubuyobozi bwa FC Barcelona bwemeje ko binyuze mu matora, abanyamuryango b'iyi kipe bemeje ko hagurishwa imigabane mu mafaranga iyi kipe izinjiza binyuze mu kugurisha ishusho yayo kuri televiziyo(TV rights).
Bidatinze FC Barcelona yahise igurisha 10% y'ibizinjira ku mafaranga izishyurwa kubera imikino yayo ya La liga yerekanwe kuri televiziyo, bakaba baragurishije iryo 10% kuri kompanyi yitwa Sixth street.
Ku ikubitiro Sixth street igiye guha FC Barcelona million 207.5 z'amayero mu mwaka w'imikino 2022-2023, ariko bizarangira FC Barcelona ihawe miliyoni 267 z'amayero.
Ntabwo haramenyekana neza niba aya mafaranga FC Barcelona irahita iyashora mu kugura abakinnyi, ariko byitezwe ko iyi kipe yayakoresha. Ikipe ya FC Barcelona yahise igaruka mu gushaka Raphinha byasaga nkaho byarangiye agiye kwerekeza muri Chelsea ava muri Leeds United.
Manchester United yifuza cyane Frenkie De Jong(Image:BeSoccer)
Ku rundi ruhande kandi FC Barcelona ikomeje ibiganiro na Manchester United aho ishaka kugurisha Frenkie de Jong, ariko bizwi ko ishaka kumurekura kubera ikibazo cy'ubukene. Ibi biteye impungenge kuri Manchester United kuko mu gihe FC Barcelona yabona ibonye amafaranga, ishobora guhita ibivamo ikagumana Frenkie De Jong.
Ikipe ya Chelsea yamaze kumvikana n'ikipe ya Leeds United ku igurwa rya Raphinha, ariko bivugwa ko Raphinha na Deco ushinzwe kumushakira amakipe, bari bategereje kureba ko FC Barcelona yagaruka imushaka.
Chelsea ifite ubwoba ko Raphinha yajya muri Barcelona(Image:Marca)
Ni mu gihe kandi FC Barcelona yari ikirimo kuganira na Ousmane Dembele wasoje amasezerano ngo barebe ko yaypngera akaguma i Barcelona, ariko impande zombi zikaba zitari kumvikana.
