Qatar2022: Pele yahaye umugisha inzozi  z'abanya-Brazil mu gikombe cy'isi

Qatar2022: Pele yahaye umugisha inzozi z'abanya-Brazil mu gikombe cy'isi

 Nov 11, 2022 - 10:41

Umunya-Brazil Pele ufatwa nk'umwami wa ruhago ku isi yemeza ko ikipe y'igihugu ya Brazil igiye kwegukana Igikombe cy'isi cya Gatandatu.

Ikirangirire muri ruhago Edson Arantes do Nascimento uzwi cyane nka Pele yatangaje ko abona Brazil ariyo izegukana Igikombe cy'isi kigiye kubera muri Qatar, ndetse afitiye ikizere kidacagase abakinnyi 26 umutoza Tite yahamagaye.

Ku wa mbere tariki 07 Ugushyingo 2022 nibwo umutoza Tite yashyize ahagaragara abakinnyi 26 azifashisha muri Qatar, aho Brazil izaba ishaka gutwara Igikombe cy'isi cya Gatandatu ikaba ari nacyo gihugu gifite ibikombe by'isi byinshi ku isi.

Abakinnyi Brazil yahamagaye:

Abazamu:Alisson (Liverpool), Ederson (Manchester City), Weverton (Palmeiras)

Ba myugariro: Dani Alves (UNAM), Danilo (Juventus), Alex Sandro (Juventus), Alex Telles (Sevilla), Bremer (Juventus), Eder Militao (Real Madrid), Marquinhos (PSG), Thiago Silva (Chelsea)

Abo hagati: Casemiro (Manchester United), Everton Ribeiro (Flamengo), Bruno Guimaraes (Newcastle), Fabinho (Liverpool), Fred (Manchester United), Lucas Paqueta (West Ham)

Abataka: Antony (Manchester United), Gabriel Jesus (Arsenal), Gabriel Martinelli (Arsenal), Neymar (PSG), Pedro (Flamengo), Raphinha (Barcelona), Rodrygo (Real Madrid), Richarlison (Tottenham Hotspur), Vinicius Jr (Real Madrid).

Pele yatwaye ibikombe by'isi bitatu

Nyuma y'ibyo Pele yagiye ku rukuta rwe rwa Instagram ashyiraho ifoto ye ya kera yambaye umwambaro w'ikipe y'igihugu ya Brazil yandikaho ati:"Bwa nyuma nambara umwambaro wa Brazil(Agikina), twari dufite inyenyeri eshatu ku kirangantego. Ubu dufite eshanu. Vuba aha turongeraho iya Gatandatu."

Pele ni umukinnyi umwe rukumbi ku isi wabashije gutwara ibikombe bitatu by'isi mu ikipe y'igihugu, aho yari muri Bazil yegukanye igikombe mu 1958, 1962 na 1970.

Ikipe y'igihugu ya Brazil ntirabasha gutwara Igikombe cy'isi kuva mu 2002 itsinda Ubudage mu mukino wa nyuma wabereye mu Buyapani; imyaka 20 yo irirenze.

Brazil izakina umukino wa mbere tariki 24 Ugushyingo 2022 aho izakina na Serbia bari kumwe mu itsinda G, rikaba ari itsinda ririmo kandi Ubusuwisi na Cameroon.

Neymar azaba ayoboye Brazil muri Qatar(Net-photo)