Sergio Kun Aguero yemeje ko afite ikizere cyo kugaruka mu kibuga akongera gukina umupira w'amaguru nk'uwabigize umwuga, nyuma y'uko agiriwe inama n'abaganga yo guhagarika gukina kubera kurwara umutima.
Uyu mugabo w'imyaka 32 yagize ikibazo ku mukino wa mbere wo mu rugo yari akiniye FC Barcelona ubwo bakinaga na Alaves bageze ku munota wa 42, ajyanwa kwa muganga afite ibibazo mu guhumeka.
Nyuma y'iminsi akurikiranwa, abaganga baje kwemeza ko akwiye guhagarika gukina umupira w'amaguru kubera indwara y'umutima bari bamusanganye. Byabaye ngombwa ko yubaha icyo cyemezo, ahagarika gukina akiniye FC Barcelona iminota 165 gusa.
Aguero nyiyahiriwe muri FC Barcelona(Image:The Mirror)
Aganira n'ikinyamakuru cy'iwabo muri Argentine cyitwa Tyc Sports, Sergio Aguero yatangaje ko yahoranye ikizere ko yazagaruka mu kibuga mu gihe ubuzima bwe bwaba bugarutse ku murongo dore ko avuga ko abaganga bamuhaye amezi atandatu ntacyo akora.
Yagize ati:"Ejo byanje mu mutwe ko ubu nshobora kuba nakongera gukina umupira w'amaguru nanone, abaganga bambwiye ko ngomba kumara amezi atanu cyangwa atandatu ntacyo nkora ariko ndumva nshaka kongera kwitoza."
Aguero kandi akomeza avuga ko hari ikipe yo muri leta zunze ubumwe za America yamaze kumusaba kuba yayisinyira igihe yaba agarutse mu kibuga, kandi avuga ko yakomeza gukurikiza inama z'abaganga.
Sergio Aguero ati:"Inter.Miami yarambajije ariko narabyanze. Mu myaka ibiri? Tuzareba..."
Sergio Aguero ni umunyabigwi wa Manchester City(Net-photo)
Sergio kun Aguero yabaye rutahizamu ukomeye cyane mu Bwongereza mu ikipe ya Manchester City yagezemo mu 2011. Yayitsindiye ibitego 260, atwaramo ibikombe 12 bikomeye. Aguero kandi yakinnye imikino 101 mu ikipe y'igihugu ya Argentine, atsindamo ibitego 41.
