Intare y'akanwa rwabwiga yaje gukanga amakipe birangira irisha

Intare y'akanwa rwabwiga yaje gukanga amakipe birangira irisha

 Jun 10, 2022 - 09:40

Ikipe ya Gasogi United yamaze gutandukana na Iddy Museremu uzwi nk'intare y'akanwa rwabwiga, nyuma yo kunanirwa gukora icyamuzanye.

Ibinyujije ku rukuta rwayo rwa twitter, ikipe ya Gasogi United yamaze gushimira uwari umukinnyi wayo Iddy Museremu, ndetse imwifuriza amahirwe mu buzima agiye gukomereza ahandi.

Uyu musore ukomoka mu Burundi yasiniye Gasogi United tariki 14 Kanama 2020, asinya amasezerano y'imyaka ibiri nyuma yo kuva mu Burundi ariwe watsinze ibitego byinshi muri shampiyona.

Iddy Museremu yari yitezweho ibitangaza

Nk'uko perezida wa Gasogi United KNC asanzwe abikora iyo yasinyishije umukinnyi, yatakagije uyu musore karahava, ndetse amwita Intare y'akanwa rwabwiga mu rwego rwo gukanga amakipe ayabwira ko azayagirira nabi cyane.

Uyu musore wari witezweho ibitangaza muri shampiyona y'u Rwanda, avuye mu ikipe ya Gasogi United atsinze igitego kimwe gusa mu myaka ibiri ayimazemo, akaba yaragitsinze mu mukino w'igikombe cy'amahoro ubwo iyi kipe yakinaga na Heroes FC.