Ni umukino uba ukomeye kurusha indi mikino yose mu Rwanda, ukaba ugiye gukinwa ku munsi wa 19 wa shampiyona mu gihe umukino ubanza APR FC yatsinze Rayon Sports ibitego 2-1.
Rayon Sports igiye kwakira APR FC ku munsi wa kane w'imikino yo kwishyura, ndetse mu mikino itatu imaze gukinwa buri kipe yatsinzwe umukino umwe ibasha gutsinda imikino ibiri.
Ni umukino uhenze ku buryo abenshi batari biteze ariko bikaba byaratewe n'uko stade yemerewe kwakira 50% y'abo isanzwe yakira kubera amabwiriza yo kwirinda Covid-19. Amafaranga yo kwinjira ni 5000, 10000 na 20000.
Abasifuzi barasifura uyu mukino bamenyekanye mbere ho iminsi ibiri, dore ko umusifuzi wo hagati aza kuba ari Ishimwe Claude waherukaga gusifura uyu mukino mu 2019. Icyo gihe Rayon Sports yasoje umukino itsinze APR FC 1-0.
Abasifuzi bo ku mpande ni Mugabo Eric uraba afite igitambaro ku ruhande rumwe, mu gihe Ishimwe Didier nawe araba afite igitambaro ku rundi ruhande, naho umusifuzi wa kane muri uyu mukino akaba Rulisa Patience nawe ufite ubunararibonye mu misifurire kubera imikino myinshi agenda agaragaraho.
Aya makipe amaze gukina imikino 94, APR FC niyo kipe imaze gutsinda imikino myinshi kuko yatsinze imikino 41, Rayon Sports itsinda imikino 29, aya makipe anganya imikino 23.
Muri iyi mikino yose APR FC yatsinze ibitego 131 naho Rayon Sports itsinda ibitego 120.Naho mu mikino 23 iheruka guhuza aya makipe muri shampiyona Rayon Sports imaze gutsindamo 5 inganya 6 itsindwa imikino 12.
Rayon Sports igiye gukina na APR FC mu gihe Murera yizeye rutahizamu w'umugande iherutse kugura mu ikipe ya Bul FC witwa Musa Esenu. Uyu mugabo amaze gutsinda ibitego bibiri mu mikino itatu ya shampiyona amaze gukina.
Mu mikino 18 aya makipe amaze gukina, Rayon Sports ishaka amanota atatu ngo igabanye ikinyuranyo hagati yayo na APR FC. Rayon Sports ifite amanota 32 naho APR FC ikaba ifite amanota 40. Rayon Sports iramutse itsinze hasigaramo ikinyuranyo cy'amanota atanu, ubundi ikagaruka mu makipe ahataniye igikombe.
Ni mu gihe kandi APR FC itsinzwe uyu mukino ishobora gukurwa ku mwanya wa mbere mu gihe Kiyovu Sports yaba yatsinze Gicumbi FC. APR FC irarusha Kiyovu Sports amanota abiri gusa.
Umutoza wa Rayon Sports Jorge Manuel da Silva Paixão Santos niwo mukino wa mbere araba akinnye na APR FC, dore ko afashe iyi kipe mu mikino yo kwishyura.
Gusa ku ruhande rwa APR FC ho umutoza Adil Errade Mohamed ntaratsindwa na Rayon Sports mu myaka isaga itatu amaze muri shampiyona y'u Rwanda.
Rurambikana hagati ya Rayon Sports na APR FC(Net-photo)
Umusifuzi Ishimwe Claude niwe usifura uyu mukino(Net-photo)
Rutahizamu Musa Esenu yitezweho guheka Rayon Sports(Net-photo)
