FC Barcelona yamaze guhabwa gasopo na AFE(ishyirahamwe ry'abakinnyi muri Espagne) kubera igitutu iyi kipe ikomeje gushyira kuri Ousmane Dembele.
Ibi bije nyuma y'uko diregiteri w'imikino wa FC Barcelona witwa Mateu Alemany, kuri uyu wa kane, yatangaje ko bamaze kubwira Ousmane Dembele ko agomba kugenda vuba aha kandi nta bwumvikane bagiranye.
Umutoza Xavi yababajwe cyane na Ousmane Dembele dore ko yababajwe no kuba uyu mufaransa atongera amasezerano muri iyi kipe yamuguze akayabo.
Ibi kandi byatumye Ousmane Dembele akurwa mu ikipe igomba gukina na Athletic Bilbao mu mikino ya Copa del rey kuri uyu wa kane.
Amasezerano ya Ousmane Dembele muri FC Barcelona azarangira mu kwezi kwa gatandatu muri uyu mwaka wa 2022, ndetse Barça iherutse gusinyisha Ferran Torres wavuye muri Manchester City bigaragara ko ariwe musimbura wa Dembele.
Nyuma y'uko diregiteri Alemany avuze ko Ousmane Dembele agomba kugenda vuba aha, byatumye AFE irakara cyane ndetse bavuga ko ibyo ari kwica amasezerano y'umukinnyi.
AFE kandi yatangaje ko ayo magambo atubahiriza uburenganzira bw'umukozi buba bugomba kubahirizwa iyo impande zombi zimaze gusinyana amasezerano.
Mu gihe iyi kipe yaba ikomeje igasohora Ousmane Dembele nta bwumvikane, ishobora kugongwa n'amategeko arengera abakinnyi nk'uko iryo shyirahamwe ryabo ribivuga, bigatuma ikipe icibwa akayabo k'amafaranga.
Ousmane Dembele yabwiwe ko agomba kuva muri FC Barcelona(Image:The mirror)
