Mu itangazo ryayo, CAF yavuze ko ayo makuru meza ashingiye ku masezerano mashya y’ubufatanye n’abaterankunga, kwagura uburenganzira bwo gutambutsa imikino kuri televiziyo n’indi miyoboro y’itangazamakuru, ndetse no kwagura isoko ry’umupira w’Afurika rikagera mu bice bishya by’isi, by’umwihariko ku mugabane wa Asia.
CAF itangaza ko biteganyijwe ko amafaranga yose azava muri AFCON Morocco 2025 azagera kuri miliyoni 192.6 z’amadolari ya Amerika, mu gihe inyungu iteganyijwe ari miliyoni 113.8 z’amadolari, bikaba ari intambwe ikomeye ugereranyije n’amarushanwa yabanje.
Ku bijyanye n’abaterankunga, CAF yasobanuye ko umubare wabo wiyongereye ku buryo bugaragara. Muri AFCON 2021 yabereye muri Cameroon, hari abaterankunga 9, bagera kuri 17 mu 2023 muri Côte d’Ivoire, naho muri AFCON Morocco 2025 bageze kuri 23.
Ibi byerekana izamuka rikomeye mu rwego rw’ubucuruzi n’icyizere abashoramari bagirira umupira w’Afurika.
CAF ivuga ko iri terambere rigaragaza ubushobozi bwayo bwo gukurura abafatanyabikorwa bashya, no gukomeza umubano n’abari basanzwe bafatanya na yo, bikaba bigamije kuzamura urwego rw’amarushanwa no kongera isura nziza y’umupira w’Afurika ku rwego mpuzamahanga.
Isoza ivuga ko aya mafaranga n’inyungu byitezwe bizagira uruhare runini mu guteza imbere umupira w’amaguru muri Afurika, by’umwihariko mu guteza imbere amarerero, amakipe y’ibihugu, amarushanwa y’imbere mu bihugu ndetse n’ibikorwaremezo by’imikino.
