Kugeza ku Cyumweru tariki 16 Ukwakira 2022 ikipe ya Arsenal igiye guhura na Leeds United ikiyoboye urutonde rwa shampiyona ya Premier League, ikaba irusha inota rimwe Manchester City iri ku mwanya wa kabiri.
Arsenal yegukanye igikombe cya shampiyona mu mwaka w'imikino 2003/04 idatsinzwe n'umukino umwe muri uwo mwaka. N'ubwo kuva icyo gihe kugeza uyu munsi itarongera gukoza intoki ku gikombe, Granit Xhaka atekereza ko bashobora gukomereza aho bageze bakabasha kugitwara.
Aganira na Daily Mail, Granit Xhaka yagize ati:"Ushobora kuba umwaka udasanzwe. Dukomeje gukora nk'uko turi kubigenza ubu, dushobora kubona ikintu gikomeye. Dukwiye kwizerera muri twe. Bitari ibyo, kuki turi gukina?"
Xhaka afitiye ikizere bagenzi be ku gikombe cya shampiyona(Image:Getty)
Granit Xhaka yakomeje avuga ko abantu bakomeje kugirira ikizere gike ikipe ya Arsenal nyamara imikino imaze gukina muri uyu mwaka w'imikino yerekana ibimenyetso bikomeye.
Yagize ati:"Ibyo numva mu bantu hanze bavuga ko tutiteguye gutsinda amakipe makuru. Ariko ubu tumaze kubikora kabiri. Twatakaje kuri Manchester United, aho twari ikipe nziza kubarusha. Dukwiye kubaha ibyo Manchester City yakoze mu myaka ishize. Uba ukwiye kugira umunsi wa ntamakemwa ngo ubatsinde. Ariko ndatekereza ko twiteguye kurwana iyi nkundura nabo."
Ikipe ya Arsenal imaze kubona amanota 24 mu mikino ikenda imaze gukina, ikaba yerekeje ku kibuga Elland Road aho iracakirana na Leeds United ku isaha ya saa 15:00.
Mu gihe Arsenal yatsinda uyu mukino biratuma ikomeza kuyobora urutonde rwa shampiyona ititaye ku biva mu mukino Liverpool yakiramo Manchester City ku isaha ya saa 17:30.
