Umutoza Xavi yatangaje ko yababaye ubwo Ousmane Dembele yamubwiraga ko agiye kuva muri FC Barcelona akerekeza muri Paris Saint-Germain yo mu Bufaransa.
Uyu musore w'imyaka 24 yongereye amasezerano y'imyaka ibiri muri FC Barcelona mu mpeshyi ishize, bivuze ko aya masezrano yari kuzarangira mu mpeshyi ya 2024. Gusa uyu musore yamaze kumvikana n'ikipe ya PSG yemeye kwishyura miliyoni 50 z'amayelo ziri mu masezerano ye.
Nyuma y'umukino ikipe ya FC Barcelona yatsinzemo AC Milan kuri uyu wa Gatatu, umutoza Xavi yavuze ku mpamvu Dembele atawugaragayemo ndetse ntiyahisha ko ababaye.
Xavi ati:"Yavuze ko hari ubusabe afite ndetse yafashe umwanzuro wo kugenda. Ntabiciye ku ruhande, yavuze ko afite ubusabe bwa PSG ko bamuhamagaye kandi ntacyo dufite twakora.
"Iyo niyo mpamvu atakinnye uyu munsi. Byambabaje kuko ntekereza ko twamufashe neza hano ngo yishime kandi anyurwe ngo akomeze akore neza."
Xavi yakomeje avuga ko abakinnyi badashaka kuba muri Barcelona babareka bakagenda, ariko yongeraho ko guhomba Ousmane Dembele bishegeshe ikipe ye.
Umukino wa nyuma Ousmane Dembele yakiniye FC Barcelona ni uwo yafashije gutsinda Real Madrid ku wa Gatandatu, akaba yaranatsinze igitego cya mbere muri bitatu batsinze muri uyu mukino wabereye Dallas muri Leta zunze ubumwe za America.
Ousmane Dembele amaze imyaka itandatu muri FC Barcelona(Image:Getty)
