Ku wa 19 Nzeri 2023 nibwo i New York muri Leta Zunze Ubumwe z'Amarika hatangiye inama ya 78 y'Umuryango w'Abibumbye, aho abakuru b'Ibihugu na za Guverinoma bari gutanga imbwirwaruhame zabo imbere y'abandi bakuru b'Ibihugu.
Ku munsi wa Kabiri w'iyi nama, Perezida Paul Kagame mu ijambo rye yagarutse ku bibazo by'ingutu byugarije isi birimo; ibibazo by'abimukira, ubusumbane mu bukungu, ibibazo by'imihindagurukire y'ikirere ndetse n'ibindi.
Perezida Kagame yatanze ibisubizo ku bibazo bya politike byugarije Isi
Umukuru w'igihugu akaba yaravuze ko nyuma yuko icyorezo cya Covid-19 kigenjeje amaguru make, ibihugu byatangiye kwiyubaka ariko n'ubundi ubusumbane bukomeza kwiyongera kuko n'ubundi ibihugu bikize byakomeje gutera imbere.
Perezida Kagame akaba yaragaragaje ko Ibihugu biri mu nzira y'amajyambere bikomeje kubangamirwa n'amadeni ahanitse bifitiye amahanga, agaragaza ko " Hakenewe ubutwererane bukwiye kugira ngo iki kibazo gikemuke."
Naho avuga ku bibazo birimo: Amakimbirane ndetse n'imihindagurikire y'ikirere, avuga ko hakenewe guhuza imbaraga kandi buri wese agakora uruhare rwe. Avuga ku kibazo cy'abimukira, yahamije ko u Rwanda ruzakomeza gukorana n'Umuryango w'Abibumbye ushizwe impunzi gushaka umuti w'iki kibazo.
Perezida Paul Kagame ari i New York mu nama y'Umuryango w'Abibumbye
Perezida Kagame kandi akaba yaravuze ko Afurika ikwiye guhagararirwa ahantu hose hafatirwa ibyemezo bibareba. Aha akaba yari ashatse kuvuga nko mu kanama gashinzwe amahoro n'umutekono ku isi, aho kabamo ibihugu bitanu birimo:USA, u Bushinwa, u Burusiya, u Bwongereza n'u Bufaransa.
Iyi nama rusange y'Umuryango w'Abibumbye, ikaba izakomeza kugera ku wa Kabiri w'icyumweru gitaha, aho abakuru bose b'ibihugu bo mu isi batambutsa ijambo ry'abo mu gihe cy'iminota 15.
