Mu kwezi gushize nibwo Umwongereza wumuherwe Sir Jim Ratcliffe yatangaje ko yifuza kuba yagura Manchester United, akayikura mu biganza by'amanyamerika bayifite aribo Glazer's family.
Byavugwaga ko umwongereza uzwi cyane muri Formula 1 ariwe Lewis Hamilton nawe azaba yifatanyije na Sir Jim Ratcliffe, bagakusanya amafaranga yo kugura iyi kipe yo mu mujyi wa Manchester.
Family Glazer ishobora kugurisha Manchester United(Image:Getty)
Inkuru dukesha Daily mail, ivuga ko Sir Jim Ratcliffe asabwa gushaka miliyari 3.75 z'amapawundi akagura iyi kipe nk'uko ariyo mafaranga Family Glazer bifuza ngo batange iyi kipe.
Gusa hari irindi zina ryatangiye kuzamuka riva muri Dubai bivugwa ko rishobora gufata iyi kipe, mu gihe abarabu bakomeje kugura amakipe akomeye mu Bwongereza.
Abo muri Dubai nta kipe bafite muri Premier league mu gihe abo muri Saudi Arabia baherutse kugura ikipe ya Newcastle United, naho abo muri Abu Dhabi bakaba bafite Manchester City.
Aha uvugwa ushobora kugura Manchester United ni uwitwa Sheikh Mohammed bin Rashid al Maktoum. Uyu mugabo ni Visi-perezida muri Leta zunze ubumwe z'abarabu, akaba minisitiri w'intebe na minisitiri w'ingabo, ndetse ni nawe muyobozi w'umujyi wa Dubai.
Amakuru ahari ahamya ko uyu mugabo w'imyaka 73 atunze amafaranga agera kuri miliyari 12.2 abariwe mu mapawundi, ndetse akaba yitezweho kuzaba umwami wa Leta zunze ubumwe z'abarabu.
Sheikh Mohammed yasoje amashuri yisumbuye mu 1965, yerekeza mu Bwongereza kwiga indimi muri kaminuza ya Cambridge.
Sheikh Mohamed bin Rashid al Maktoum ushobora kugura Manchester United(Image:AFP)
