Ikipe ya Manchester United iri kwitegura kugerageza bya nyuma ngo yumvishe Frenkie de Jong akwiye kujya Old Trafford n'ubwo umukinnyi wo hagati muri FC Barcelona atabishaka.
Uyu mukinnyi mpuzamahanga w’Ubuholandi amaze igihe kinini ashakishwa n’amashitani atukura, aho yakongera gutozwa n'uwahoze ari umutoza we muri Ajax Erik Ten Hag.
Bitewe n'ibibazo by'ubukungu ikipe ya FC Barcelona yifuza kurekura uyu musore, gusa we ntashaka kuyivamo ngo ajye i Manchester.
Uyu musore w'imyaka 25 afatwa nk'umwe mu bari muri FC Barcelona bashobora kubyazwa amafaranga mu gihe iyi kipe iri mu bihe bitoroshye, ndetse akaba ari no mu bakinnyi bahembwa menshi muri iyi kipe.
Bivugwa ko Manchester United na FC Barcelona zamaze kwemeranya miliyoni 63 z'amapawundi, ariko Frenkie de Jong we akomeza kuba ibamba avuga ko adashaka kugenda.
Manchester United iracyashaka Frenkie de Jong(Image:Getty)
Mu gihe akazi ko kumvikana na FC Barcelona karangiye, ubu biravugwa ko Manchester United yitegura guha Frenkie de Jong umushahara atabasha kwanga.
Kuri ubu uyu mukinnyi wo hagati ari muri leta zunze ubumwe za Amerika aho FC Barcelona ikomeje kwitegurira umwaka mushya w'imikino uzatangira muri Kanama.
Mu rwego rwo kugegageza no kumwirukana, Barcelona yamenyesheje De Jong ko mu gihe ataba yemeye kugabanya umushahara bigoye ko yakina umwaka utaha w'imikino i Barcelona.
Gusa isohoka ry'uyu mugabo riragoye kuko iyi kipe inamurimo umwenda wa miliyoni 17 z'amapawundi igomba kubanza kumwishyura.
Uyu musore kandi akomeza kwanga ibyo kujya muri Manchester United izakina Europa league mu mwaka utaha w'imikino, mu gihe yaba avuye muri FC Barcelona izakina Champions league.
