Abaturage bo mu mujyi wa Goma baratangaza ko kuva mu ijoro ryacyeye kugeza mu gitondo cyo kuri uyu wa kabiri hatakiri kumvikana amasasu menshi nko ku wa mbere, ni nyuma y'imirwano yabaye ku wa mbere cyane cyane mu burasirazuba bw'uyu mujyi.
Biracyagoye kumenya neza ibice bigenzurwa n'ingabo za leta zigihanganye n'umutwe wa M23 winjiye mu mujyi wa Goma ugatangaza ko wawufashe.
Igisirikare cya Uruguay gifite ingabo ziri mu butumwa bwa MONUSCO cyasohoye itangazo rivuga ko "nyuma y'umuhate wa MONUSCO, impande ziri kurwana zumvikanye agahenge", zivuga ko ako gahenge katangiye kubahirizwa saa moya z'ijoro i Goma.
Icyakora MONUSCO, ingabo za leta, cyangwa M23 ntacyo baratangaza kuri ibi bivugwa n'ingabo za Uruguay.
Umwe mu baturage ba Goma yabwiye BBC ko nubwo hari agahenge ariko hacyumvikana amasasu make, ni mu gihe nta muriro n'amazi wabona muri uyu mujyi.
Ibiro ntaramakuru AFP bivuga ko imirwano yo ku wa mbere i Goma yahitanye abasivile 17 naho aarenga 300 barakomereka.
Ibihugu by'iburengerazuba bikomeje gusaba ko imirwano ihagarara hagakomeza ibiganiro by'amahoro.
