Mu gitondo cyo kuri uyu wa Gatandatu tariki ya 16 Werurwe 2024, nibwo imirwano yongeye kubura mu burasirazuba bwa Repubulika Iharanira Demokarasi ya Congo hagati y'Ingabo za Leta FARDC ndetse n'umutwe wa M23 byumwihariko mu gace ka Sake kari kamaze iminsi mu gahenge.
Umuvugizi wa M23 mu bya Politike bwana Lawrence Kanyuka niwe wari wabyutse yandika ko ingabo za Leta nabo bafatanya babyutse bagaba ibitero mu gace ka Sake no mu nkengero, aho yemezaga ko M23 iri kurwana ku baturage.
Uyu muvugizi mu ma saa sita zo ku mwanya yongeye kugaruka ku rukuta rwe rwa X atangaza ko ingabo za M23 zarinze abaturage mu bice ingabo za Leta zagabyemo ibitero ndetse bakabasha kuzirukana zigasiga intwaro.
Imbunda M23 ivuga yatse FARDC i Sake
Ati "Ingabo za ARC/M23 zarinze abaturage b’abasivili ibitero by’ingabo z’ubutegetsi bwa Kinshasa muri Sake, Macafe, Mitumbara, Lushoga, Kagundu no mu Turere tuyikikije.
Hamwe n’ubwitange budacogora mu kurengera abaturage b’inzirakarengane, ingabo za AFC / M23 zagaragaje ubuhanga n’ubushake mu kubungabunga umutekano mu Turere twabohowe."
Uyu muvugizi yunzemo ko kuba Ingabo za Leta nabo bafatanya basize intwaro bakagenda, ari ikimenyetso cy'uko M23 ikora neza.
Ati "Icyemezo cy’ingabo z’ubutegetsi bwa Kinshasa cyo kureka intwaro zabo, amasasu n’ibikoresho bya gisirikare ku rugamba, ni ikimenyetso cyerekana ko ingabo za AFC/M23 zikora neza."
Mu mafoto yashyizwe hanze na M23, agaragaza imbunda zafashwe ziganjemo iza AK-47, machine gun, ndetse n'ibindi bisasu. Icyakora, uruhande rwa Leta ntacyo ruratangaza kubyo M23 iri kuvuga magingo aya.
Imbunda M23 ivuga ko yambuye FARDC
