Mu gihe abasirikare ba Israel bitegura kwambutsa ibifaru n'ibimodoka by'intambara ku butaka bwa Gaza by'umwihariko mu gice cy'Amajyaruguru kujya gutsinsura umutwe wa Hamas wabashojeho intambara, iki gihugu cyambariye ku rwana n'umutwe wa Hezbollah wo muri Lebanon ukanganye kuruta Hamas.
Igisirikare cya Israel "Israel Defense Forces ADF," binyuze kuri Minisitiri w'Ingabo Yoav Gallant yatangaje ko abaturage b'iki gihugu batuye ku mupaka ubahuza na Lebanon mu Majyaruguru ko abatuye nibura muri Kilometero ebyiri bagomba kwimuka. Ibi bibanye nyuma yuko Israel imaze iminsi ihererekanya ibisasu bya misile n'umutwe ka buhariwe wa Hazbollah wo muri Lebanon.
Israel mu nzira zo kwambarana na Hezbollah
ADF ikaba ivuga ko imidugudu 28 abayituye bagomba kwimuka aho ku mupaka. Ku rundi ruhande, Minisitiri w'intebe wa Israel Benjamin Netanyahu yagiye mu nama y'ikubagahu kuri Minisiteri y'Ingabo kugira ngo bategure neza igitero cyo ku butaka muri Gaza
Ni mu gihe abasirikare ba Israel barenga 10,000 n'ibimodoka by'intambara bategereje ko abaturage batuye mu Majyaruguru ya Gaza mu gace ka Wadi bimukira mu Majyepfo yiyi Ntara bagatangira kuhasuka ibisasu biremereye. Nyamara, Hamas iravuga ko Israel nidahagarika ibyo bitero iratangira kwica abo yafashe bugwate barenga 120.
Israel iratangaza ko abaturage batuye hafi y'umupaka wayo na Lebanon bagomba kwimuka
Nubwo Israel ishaka kwinjira muri Gaza, ariko Perezida wa USA Joe Biden yasabye Israel ko itakora ikosa ryo kwigarurira intara ya Gaza, akaba yemeza ko bagomba kurwanya Hamas ariko ahakana ibyo kwigarurira iyi Ntara ku ngufu.
Iminsi 600 Ukraine n'u Burusiya barwana
Mu gihe mu burasirazuba bwo hagati ibintu biri guhindura isura, mu Burayi naho intamba irakomeje aho Ukraine ishyigikiwe n'u Burengerazuba bw'isi ikomeje kwesurana n'u Burusiya bwa Perezida Vladimir Putin.
Perezida Vladimir Putin yafunguye ikiraro gishya muri Mariupol
Magingo aya ku munsi wa 600 barwana, Perezida Putin yatunguye Ukraine ajya gufungura ikiraro cya rutura mu mugi wa Mariupol mu Ntara ya Donetsk. Uyu mugi wa Mariupol ukaba ari umwe mu migi yabereyemo imirwano y'akasamutwe muri Gicurasi 2022 intambara igitangira.
Ni mu gihe kandi iyi Ntara ya Donetsk, ari imwe mu Ntara Enye muri Nzeri 2022 zatoye ziyomeka ku Burusiya zivuye kuri Ukraine. Izo Ntara ni: Donetsk, Luhansk, Kherson na Zaporizhzhia. Magingo aya, izi zikaba zifatwa nk'intara z'u Burusiya nubwo Ukraine icyirashya imigeri.
