Umukino Manchester United yatsinzwemo na Arsenal ibitego bitatu kuri kimwe wari umukino wa kane wo hanze(away games) wikurikiranya muri shampiyona iyi kipe itsinzwe, ibi bikaba byaherukaga kuba kuri iyi kipe mu myaka 41 ishize.
Ibitego bya Arsenal atsinzwe na Nuno Tavares, Bukayo Saka na Granit Xhaka, mu gihe kimwe cya Manchester United cyatsinzwe na Cristiano Ronaldo, naho Bruno Fernandes we agahusha penariti.
Iyo mikino ni Arsenal yayitsinze 3-1 kuri Emirates stadium, Liverpool yayitsinze 4-0 kuri Anfield, Everton yayitsinze 1-0 kuri Goodison Park ndetse na Manchester City 4-1 kuri Etihad stadium.
Igihe Manchester United yaherukaga gutsindwa imikino ine yo hanze ikurikirana muri shampiyona ni mu mwaka w'imikino 1980-1981. Kuva mu Ukuboza 1980 kugeza muri Werurwe 1981 iyi kipe nta nota na rimwe yigeze ibona mu mikino yo hanze, ndetse yasoje shampiyona iri ku mwanya wa munani.
Arsenal yagaruye ibyaherukaga kuba kuri Manchester United kera(Image:Getty Image)
Gutsindwa uyu mukino byahise biyoyora amahirwe iyi kipe yari ifite yo gusoza umwaka w'imikino mu makipe ane ya mbere, dore ko Arsenal yahise ifata umwanya wa kane aho irusha Manchester United amanota atandatu kandi yarakinnye imikino mike ugereranyije na Manchester United.
Nyuma y'uyu mukino umutoza Ralf Rangnick ubwe yabajijwe ku bijyanye n'amahirwe bafite yo kujya muri Champions league, yemeza ko abona ko amahirwe ya Manchester United yayoyotse.
