Wari umukino w'umunsi wa 29 wa shampiyona ya Espagne ariyo La liga, ariko ukaba umukino wa 28 kuri FC Barcelona kuko ifite umukino umwe w'ikirarane itakinnye.
FC Barcelona yari yasuye mukeba wayo Real Madrid mu gihe hari hashize imikino itandatu Barça itazi uko gutsinda Real Madrid bimera. Muri iyo mikino itanu iheruka yose Real Madrid yarayitsinze, mu gihe undi umwe bawunganyije.
Mu minota ya mbere y'uyu mukino abazamu b'impande zombi bakoze akazi gakomeye aho bagendaga bakuramo amashoti y'abataka, ariko Pierre-Emerick Aubameyang wari wabanje guhusha yaje gutsinda igitego ku munota wa 29 ku mupira mwiza wari uhinduwemo na Ousmane Dembele ku ruhande rw'iburyo kiba igitego cya mbere cya FC Barcelona.
Bidatinze ku munota wa 38 FC Barcelona yabonye kona(corner) iterwa neza na Ousmane Dembele maze myugariro Ronald Araujo ashyiraho umutwe, maze Barça ihita yandikisha igitego cya kabiri byanatumye igice cya mbere kirangira iyoboye umukino.
Igice cya kabiri kigitangira Aubameyang yahaye umupira Ferran Torres atsinda igitego cya gatatu ku munota wa 47, ndetse ku munota wa 51 Ferran Torres nawe yishyura Aubameyang amuha umupira mwiza atsinda igitego cya kane cyanasoje umukino.
Iyi yari El-clasico ya mbere umutoza Xavi atoje mu mezi atageze kuri ane ageze muri iyi kipe, aho yaje asimbura Ronald Koeman byagaragaraga ko ibintu byanze muri FC Barcelona.
Ikipe ya FC Barcelona yahise ifata umwanya wa gatatu yari yakuweho na Atletico Madrid zinganya amanota 54, ikaba irushwa amanota atatu na Sevilla ya kabiri, naho Real Madrid ya mbere ikaba iyirusha amanota 12. Gusa ikipe ya FC Barcelona ifite umukino umwe w'ikirarane itarakina.
Aubameyang yatsinze ibitego bibiri(Net-photo)
