Minisiteri y’Ubuzima mu Rwanda yatangaje ko ku Cyumweru tariki 18 Nyakanga 2021, mu Rwanda abantu 2,773 babasanzemo Covid-19, muri bo 2,225 bakaba babonetse i Kigali. Abakize ni 1,855, abantu 11 bitabye Imana, naho abarembye ni 72 nk’uko imibare yatangajwe ibigaragaza.
Muri rusange aba bantu 2,773 basanzemo Coronavirus babonetse mu bipimo 73,608, iyi mibare ikaba ishobora kuba yazamuwe na gahunda yakozwe muri Kigali yo gupima abantu benshi bikorewe ku rwego rw’Akagari.
Abitabye Imana ni abagore batanu b’imyaka 75 (Rulindo), 71, 66 (Kigali), 69 (Rubavu) na 69 (Rusizi) n’abagabo batandatu b’imyaka 71 (Rulindo), 69, 60, 57 (Kigali) 62 (Huye) na 50 (Karongi), bakaba bahise buzuza umubare w’abantu 649 bamaze kwicwa n’iki cyorezo mu Rwanda.
Abarimo kuvurwa bose hamwe ni 16,632.
Inzego zishinzwe ubuzima zisaba Abaturarwanda baba abakingiwe n’abatarakingirwa gukomeza kwitwararika birinda kwandura cyangwa kwanduza abandi icyorezo cya COVID-19 gikomeje kugaragaza ubukana mu Rwanda n’ahandi ku isi.
