Amakuru akomeje kuva i Barcelona aravuga ko ikipe ya FC Barcrelona yaba yamaze kwemera ubusabe bwa Aston Villa bwo gutira umunya-Brazil Philippe Coutinho.
Philippe Coutinho ntiyagiriye ibihe byiza muri FC Barcelona kuva yayigeramo mu 2018 aguzwe miliyoni 145 z'amapawundi.
Uyu mugabo wavuye mu ikipe ya Liverpool ari ku rwego rwo hejuru yageze muri FC Barcelona yitezweho byinshi ariko ubu no kubona umwanya wo gukina biramugora.
N'ubwo umutoza mushya wa FC Barcelona ariwe Xavi yagerageje kumuha umwanya muri uyu mwaka w'imikino, uyu musore yatsinze ibitego 2 mu mikino 16 amaze gukina muri uyu mwaka w'imikino.
Ubu amakuru atangazwa na TalkSport aravuga ko yaba agiye kwerekeza muri Aston Villa iri gutozwa na Steven Gerrard bakinanye muri Liverpool.
Philippe Coutinho w'imyaka 29 biteganyijwe ko aza kwerekeza muri Aston Villa ku ntizanyo ndetse bikaba biratangazwa mu masaha make ari imbere.
Aston Villa igaritse amakipe atandukanye yifuzaga Philippe Coutinho arimo Arsenal, Everton, Tottenham na Newcastle United nk'uko byavuzwe mu minsi ishize.
Ubwo Steven Gerrard yabazwaga ku kuba Philippe Coutinho yamusanga muri Aston Villa yavuze ko ari umukinnyi mwiza cyane.
Gerrard ati:"Ni umukinnyi mwiza cyane, Gusangira nawe ikibuga ndetse n'urwambariro byari bishimishije cyane kandi ari ku rwego ruriho abakinnyi bake.
"Ibyo atekereza, udushya n'imikinire birahanitse. Ndatekereza ko izina ubwaryo ryivugira."
Philippe Coutinho ntiyahiriwe muri FC Barcelona(Image:Marca)
Coutinho agiye gutozwa na Steven Gerrard bakinanye(Image:Sport)
