Byabaye ngombwa ko abafana b'ikipe y'igihugu ya Sweden bafungiranwa muri stade ya Baudouin iherereye i Buruseri kugeza saa Kumi za mu gitondo, nyuma y'uko bagenzi babo babiri barashwe ndetse bakitaba Imana mu ijoro ryo kuri uyu wa Mbere.
Ibi byabaye mbere y'umukino wo gushaka itike ya Euro2024 aho u Bubirigi bwari bwakiriye Sweden, byaje no gutuma uyu mukino uhagarikwa utarangiye mu gice cya mbere.
Mu kiganiro Minisitiri w'intebe w'u Bubirigi, Alexander De Croo, yagiranye n'itangazamakuru muri iki gitondo yatangaje ko impamvu yari yihishe inyuma y'aba barashwe aruko ari abanya-Sweden.
Ati:"Uwarashe yashakaga abafana b'abanya-Sweden bari bari mu mujyi wa Buruseri baje kureba umukino wabahuje n'u Bubiligi. Abanya-Sweden babiri bitabye Imana, uwa gatatu arimo gukira ibikomere."
De Croo yakomeje avuga ko uwakoze ibi yagirango atere ubwoba abantu ndetse anareme amacakubiri mu bantu, ariko avuga ko abazana iterabwoba batazigera batsinda.
Minisitiri w'ubutabera mu Bubirigi witwa Vincent van Quickenborne yatangaje ko ukekwa ari umunya-Tunisia w'imyaka 45 wageze mu Bubirigi mu 2019, akaba yaramenyekanye kuri police nk'utuye muri iki gihugu bitemewe n'amategeko.
Babiri bahasize ubuzima undi umwe arakomereka
Umukino wahagaritswe utarangiye
Abafana na Sweden basohotse muri stade mu gitondo
