Prince Kid yasabiwe n'ubushinjacyaha gufungwa imyaka 16

Prince Kid yasabiwe n'ubushinjacyaha gufungwa imyaka 16

 Oct 6, 2022 - 16:36

Ishimwe Dieudonné wamamaye nka Prince Kid yaburaniye mu muhezo nubwo we yifuzaga kuburanira mu ruhame.

Ubushinjacyaha  bwasabiye Kagame Ishimwe Dieudonné wateguraga irushanwa rya Miss Rwanda gufungwa imyaka 16 ku byaha aregwa, nk’uko amakuru abivuga. 

Urubanza rwe mu mizi rwatangiye kuwa Gatatu mu rukiko rwisumbuye rwa Nyarugenge ruherereye mu karere ka Nyarugenge mu mujyi wa Kigali ariko umucamanza ahita ategeka ko rushyirwa mu muhezo.

Uregwa we yabanje gusaba ko urubanza rwe rubera mu ruhame kugira ngo abantu bamenye ibirukubiyemo. 

Ishimwe uzwi nka Prince Kid aregwa ibyaha bibiri bishingiye ku birego by' umwe mu bitabiriye Miss Rwanda;
Gusaba undi ishimishamubiri rishingiye ku gitsina no guhoza undi ku nkeke bifitanye isano n'imibonano mpuzabitsina. 


Mu maburanisha yabanje, Ishimwe yahakanye ibyaha yarezwe avuga ko ari umwere. 

Mu kwezi kwa Gicurasi(5) yakuweho kimwe mu byaha yari yarezwe cyo gusambanya undi ku ngufu.

Mu iburanisha ryabaye kuwa Gatatu mu muhezo ubushinjacyaha bwasabiye Ishimwe Dieudonné gufungwa imyaka 16. 

Ishimwe yatawe muri yombi muri Gicurasi(5) uyu mwaka nyuma y’ibirego byatanzwe n'umwe mu bakobwa bitabiriye Miss Rwanda mu myaka ishize. Yafashwe ku Itariki 25 Mata 2022.

Perezida wari uyoboye inteko iburanisha yategetse ko uru rubanza ruzasomwa tariki 28 z’uku kwezi k’Ukwakira.

Nyuma y'ibi birego kuri Ishimwe, Leta yahagaritse by'agateganyo irushanwa rya Miss Rwanda, kimwe mu bikorwa by'imyidagaduro bikurikiranwa na benshi mu Rwanda. Imibare yerekanako Miss Rwanda yakurikirwaga na miliyoni 46.