Kuri uyu wa Gatanu tariki ya 03 Werurwe 2023, habaye kurasana hagati y'ingabo z'u Rwanda RDF n'ingabo za Repubulika Iharanira Demokarasi ya Congo FARDC.
Uku kurasana kwabereye mu Burengerazuba bw'u Rwanda mu Karere ka Rubavu, ku mipaka y'ibihugu byombi ya Grande barrière ndetse na Petit barrière.
Imipaka ya Grande barrière na Petit barrière yabereyeho kurasana hagati ya RDF na FARDC
Mu itangazo ryasohowe kuri uyu mugoroba n'ingabo z'u Rwanda RDF tariki ya 03 Werurwe 2023, zanditse ko ahasaga saa 17h35 Umusirikare wa Congo FARDC yinjiye ku mupaka w'u Rwanda arasa.
Nyuma y'uko yinjiye arasa ingabo z'u Rwanda nazo zasubije zirasa, birangira n'izindi ngabo za Congo zije habaho kurasana ku mpande zombi.
Iri tangazo rikomeza rivuga ko nyuma yo kurasana haguye umusirikare umwe w'ingabo za Congo FARDC, akagwa ku butaka bw'u Rwanda.
Ingabo z'u Rwanda zikaba zatangaje ko ingabo za Congo zavogereye ubutaka bw'u Rwanda, basaba abashinzwe ibyo kugenzura imipaka kuza kugenzura ibyabaye.
Iyi ni inshuro ya Gatatu umusirikare wa Congo FARDC araswa n'ingabo z'u Rwanda RDF.
Inshuro ya mbere byari muri Kanama 2022, indi nshuro byari mu Gushyingo 2022.
Ubushyamirane hagati y'ibihugu byombi bukaba bukomeje gufata intera kubera Leta ya Congo ikomeza gushinja u Rwanda gufasha umutwe wa M23 uri mu ntambara n'iki gihugu.
Nyamara nubwo Leta ya Congo ishinja u Rwanda gufasha M23, Perezida w'u Rwanda Paul Kagame yavuze ko nta nyungu na nke u Rwanda rwagira yo guhungabanya umutekano w'igihugu cy'umuturanyi.
DRC SOLDIER FIRES AT RDF IN RUBAVU DISTRICT
— Yolande Makolo
Today at around 17h35 a soldier of FARDC crossed over from DRC and shot at RDF soldiers manning the common border between Grande Barrière and Petite Barrière in Rubavu District, in Rwanda's Western Province. https://t.co/BA0OVsVlNP
