Yari imikino y'umunsi wa kabiri mu matsinda ya UEFA Champions league 2022-2023, aho kuri uyu wa Kabiri hakinnye kuva mu itsinda A kugeza mu itsinda.
Umukino wari ukomeye kurenza iyindi ni umukino wahuje Bayern Munich na FC Barcelona ziri mu itsinda C, ukaba wabereye mu Budage kuri Allianz Arena aricyo kibuga cya Bayern Munich.
Abakinnyi babanje mu kibuga ku mpande zombi:
Bayern Munich
Manuel Neuer, Benjamin Pavard, Dayot Upamecano, Lucas Hernández, Alphonso Davies; Joshua Kimmich, Marcel Sabitzer; Leroy Sané, Thomas Müller, Jamal Musiala na Sadio Mané.
FC Barcelona
Andre Ter Stegen; Jules Kounde, Ronald Araujo, Andreas Christensen, Marcos Alonso; Pablo Gavi, Sergio Busquets, Pedri; Raphinha, Robert Lewandowski na Ousmane Dembélé
Ni umukino abenshi bari biteze kureba uko Sadio Mane wasinyiye Bayern Munich ava muri Liverpool aza kwitwara, ariko nanone rutahizamu Robert Lewandowski wavuye muri Bayern Munich yerekeza muri FC Barcelona nawe amatsiko yari menshi.
Umukino watangiye amakipe yombi asa naho yigana cyane, by'umwihariko Bayern Munich itashakaga gusiga umwanya na muto mu bwugarizi bwayo.
Ku munota wa 20 Bayern Munich yakoze impinduka havamo umufaransa Benjamin Pavard wagize ikibazo cy'imvune, hajyamo umunya-Maroc Noussair Mazraoui.
Uko iminota yagiye ikura amakipe yombi yageragezaga kureba uburyo yashaka igitego ariko bikomeza kugorana igice cya mbere kirangira banganya ubusa ku busa.
Igice cya kabiri cyatangiranye n'impinduka ku ruhande rwa Bayern Munich, Marcel Sabitzer wari weretswe ikarita y'umubondo ava mu kibuga, hinjira Leon Goretzka.
Ku munota wa 50' nibwo Bayern Munich yabonye koruneri iterwa neza na Joshua Kimmich, Lucas Hernandes atera umupira n'umutwe atsinda igitego, Bayern Munich iba ibonye igitego cyayo cya mbere.
Nyuma y'iminota ine gusa nibwo Leroy Sane yatsinze igitego cya kabiri ku ruhande rwa Bayern Munich cyarangije ibintu byose, ab'i Barcelona bari bafite inzozi zo kwihorera kuri Bayern Munich bahita basubiza amerwe mu isaho.
Lewandowski yananiwe gufasha Barcelona kubona igitego muri Bayern Munich yahozemo
Iminota yakurikiye yabayemo impinduka nyinshi ku mpande zombi ariko zitagize icyo zitanga. Muri Bayern Munich havuyemo Sadio Mane hajyamo Serge Gnabry, havamo Leroy Sane hajyamo Matys Tel, ndetse havamo Jamal Musiala hajyamo Ryan Gravenberch.
FC Barcelona nayo yakoze impinduka havamo Raphinha hinjira Ferran Torres, havamo Gavi hinjira Frenkie De Jong, Christensen ava mu kibuga hinjira Eric Garcia, Dembele na Busquets bavamo hinjira Kessie na Ansu Fati.
Ku rundi ruhande ikipe ya Liverpool iri mu bihe bitayoroheye yongeye kubona itsinzi. Muri uyu mukino wabereye Anfield Stadium, Mohamed Salah yagunguye amazamu ku munota wa 17 ku mupira yahawe na Diogo Jota.
Iki gitego kishyuwe na Mohamed Kudus ku munota wa 27 ku mupira yari ahawe na Steven Berghuis, ariko Joel Matip atsindira Liverpool igitego cya kabiri ku munota wa 89 ku mupira yahawe na Tsimikas.
Liverpool yongeye kubona intsinzi bigoranye
