Thierry Henry yamaze kugaragaza aho ahagaze kuri Ballon d'Or y'uyu mwaka nyuma y'uko Real Madrid itsinze Liverpool ku mukino wa nyuma wa UEFA Champions league.
Ku bwa Thierry Henry we abona ko no gukoresha amatora nk'uko bisanzwe atari ngombwa, kuko abona Karim Benzema yaramaze kuyitwara bitewe n'umwaka w'imikino uyu mufaransa yagize batwara Champions league na La liga.
Karim Benzema yatsinze ibitego 15 muri UEFA Champions league y'uyu mwaka, akaba yaburaga ibitego bibiri ngo agere ku gahigo ka Cristiano Ronaldo ubwo yatsindaga ibitego 17 mu mwaka w'imikino 2013/14.
Benzema yatsinze ibitego by'ingirakamaro cyane kuri Real Madrid cyane cyane mu mikino yo gukuranwamo. Yatsinze ibitego bitatu mu mukino umwe bakina na PSG, atsinda ibitego bitatu mu mukino umwe bakina na Chelsea ndetse yongera no gutsinda Manchester City mu mukino ubanza n'uwo kwishyura.
Henry abona Benzema akwiye guhabwa Ballon d'Or nta n'amatora abayeho(Image:Getty)
Muri rusange muri uyu mwaka w'imikino Karim Benzema yatsindiye Real Madrid ibitego 44 byose, byatumye aca kuri Raul akaba umukinnyi wa kabiri watsindiye iyi kipe ibitego byinshi mu mateka yayo.
Ibi nibyo byanyuze cyane umufaransa Thierry Henry ndetse akabona ko akwiye guhabwa Ballon d'Or bitabaye ngombwa ko habaho n'amatora.
Thierry Henry yagize ati:"Ndashaka kubwira ikintu France Football(itanga Ballon d'Or) cyangwa buri wese utora. Muhagarike amatora. Benzema yarayitsindiye. Bye!"
Karim Benzema yageze muri Real Madrid mu 2009 aguzwe miliyoni 35 zamapawundi avuye muri Lyon yo mu Bufaransa, nyuma yo gutwara ibikombe bine bya shampiyona n'igikombe cyimwe cy'igihugu.
Benzema amaze gutsinda ibitego 323 mu mikino 605 yakiniye Real Madrid, akaba yaratwayemo ibikombe binyuranye birimo na UEFA Champions league eshanu.
