Pep Guardiola utoza Manchester City avuga ko nta kosa yashinja abakinnyi ku mukino bakinnye, ndetse yemeza ko yakorozwe cyane n'imikinire yo kugarira yakinwe na Tottenham Hotspurs.
Ikipe ya Manchester City yarushije Tottenham ku buryo bugaragara dore ko Man.City yasoje iri ku kigero cyo kwiharira umupira cya 71 ku ijana mu gihe Tottenham yari ifite 29 ku ijana.
Gusa n'ubwo Manchester City yakinnye itya ntibyayibujije gutsindwa uyu mukino ku gitego cyatsinzwe na Harry Kane mu minota y'inyongera gisoza umukino ari ibitego bibiri bya Manchester City kuri bitatu bya Tottenham.
Nyuma y'uyu mukino Pep Guardiola yagize ati:"Tukimara kubajya inyuma bugariye bikabije kandi ku buryo bwegeranye.
"Ntabwo batakaza umupira Harry Kane, Son na Kulusevski baba biruka.
"Ndatekereza ko twakinnye neza. Twaremye uburyo bwinshi. Sinavuga ikintu kibi ku ikipe kuko twari duhari ku gihe. Ariko byari bikomeye.
"Bakinnye uko nari niteze ko barakina. Bari beza mu kubaka umukino kandi bakarema imyanya yo kwirukankiramo muri counter-attack, ariko muri rusange twakinnye umukino mwiza.
"Buri wese azi ibyo Harry Kane atanga. Ku gitego cya mbere twugariye, ariko nyuma y'iminota 10 kugeza kuri 15 twaremye uburyo bwinshi. Lloris yari mwiza cyane. Twari kuba twatsinze ibitego byinshi kurushaho."
Manchester City yatsinzwe uyu mukino mu gihe Liverpool yatsindaga Norwich ibitego bitatu kuri kimwe. Liverpool yahise igira amanota 57 mu gihe Man.City yagumye ku manota 63.
Ibi bivuze ko Manchester City irusha Liverpool amanota atandatu mu gihe Liverpool igifite umukino umwe w'ikirarane itarakina.
Tottenham yatsinze Manchester City ibitego 3-2(Net-photo)
Pep Guardiola avuga ko Tottenham yugarira bikabije(Image:The Independent)
