Paul Pogba yatangiye gukina ku rwego rwo hejuru kuva mu 2012 ubwo yavaga muri Manchester United yerekeza muri Juventus, yongera kugaruka muri Manchester United mu 2016 aguzwe akayabo.
Pogba yahuye n'abakinnyi benshi bakomeye ku isi mu marushanwa yagiye akina arimo Serie A, Premier league, Champions league, Euro ndetse n'igikombe cy'isi yanatwaranye n'ikipe y'igihugu y'Ubufaransa.
Uyu mugabo w'imyaka 29 yagiye arwana inkundura mu kibuga hagati n'abakinnyi bakomeye barimo Kevin De Bruyne wa Manchester City, N'Golo Kante wa Chelsea ndetse na Andreas Iniesta wakiniraga FC Barcelona.
Gusa abo bose nta n'umwe wamugoye cyane nk'uko umudage Emre Can wakiniraga Liverpool yabikoze, nk'uko Paul Pogba yabitangarije Football Joe ubwo yari abajijwe umukinnyi wamugoye kurenza abandi.
Pogba yagize ati:"Ku bigaragara hari nka N'Golo n'abandi. Ariko uwo nibuka twarwanye inkundura ikomeye cyane ni Emre Can."
Emre Can yageze mu ikipe ya Liverpool mu 2014 ubwo yari avuye mu ikipe ya Bayern Leverkusen, amaramo imyaka ine ahita yerekeza muri Juventus yo mu Butariyani. Uyu mugabo yakinnye imikino 167 muri Liverpool atsinda ibitego 14 atanga n'imipira 12 yavuyemo ibitego.
Kuri ubu Emre Can ari muri Borussia Dortmund nyuma y'uko Juventus yamutijeyo mu 2020 bikarangira aguzwe n'iyi kipe y'iwabo mu Budage.
Pogba avuga ko Emre Can ariwe mukinnyi wamugoye cyane mu kibuga(Net-photo)
